Апта ішіндегі кадрлық тағайындаулар

Атап айтқанда, Нұржан Келбуғанов Теміржол және су көлігі комитетінің төрағалығына тағайындалды. 

Нұржан Келбуғанов 1972 жылы Шығыс Қазақстан облысында дүниеге келген. Ол Алматы теміржол көлігі инженерлері институтын және М. О. Әуезов атындағы Семей университетін бітірген.

Еңбек жолын «ҚТЖ «ҰК» АҚ – «Алматы жол бөлімшесі» филиалының паркі бойынша кезекші болып бастады. Әр жылдары тасымалдау құжаттарын өңдеу жөніндегі оператор, станция бойынша кезекші, орталықтандыру бекетінің аға операторы, жол диспетчері және бірқатар станцияның бастығы болып жұмыс істеді.

Сондай-ақ «ҚТЖ «ҰК» АҚ – «Ақмола жол бөлімшесі» филиалы директорының жедел жұмыс жөніндегі бірінші орынбасары, «ҚТЖ «ҰК» АҚ – «Шығыс Қазақстан жол бөлімшесі» филиалының директоры, «ҚТЖ-Жүк тасымалы» АҚ департаментінің директоры, «ҚТЖ-Жүк тасымалы» ЖШС бас директорының маркетинг және жоспарлау бойынша орынбасары болды.

Алматы облысы әкімінің өкімімен Ғани Майлыбаев Алматы облысы әкімінің орынбасары лауазымына тағайындалды. 

Ғани Айдарұлы 1987 жылы туған. Білімі — жоғары. 2008 жылы Абай атындағы қазақ ұлттық педагогика университетін «қаржы» мамандығы, 2018 жылы Ресей Федерациясы Президентінің жанындағы Ресей халық шаруашылығы және Мемлекеттік қызмет академиясын «аймақтық және муниципалды басқару» мамандығы бойынша бітірген, 2010 жылы Абай атындағы қазақ ұлттық педагогика университетінде «құқық және экономика негіздері» мамандығы бойынша магистр дәрежесін алған.

Еңбек жолын 2008 Алматы қаласы «Нұр Отан» партиясы Бостандық аудандық филиалының есеп және статистика секторының меңгерушісі болып бастаған.

Әр жылдары Алматы қаласы «Нұр Отан» партиясы Алатау аудандық филиалының заңгер-консультанты, Медеу аудандық филиалы төрағасының бірінші орынбасары, Алматы қаласы Медеу, Наурызбай аудандары әкімінің орынбасары, Жамбыл облысы туризм басқармасының басшысы лауазымдарын атқарған. 2020 жылдың желтоқсан айынан бастап Алматы қаласы мәдениет басқармасының басшысы лауазымында қызмет етті.

Жамбыл облысы әкімінің өкімімен Алтай Сембекұлы Әлі Жамбыл облысы әкімінің орынбасары лауазымына кірісті. 

Алтай Сембекұлы 1985 жылы Жамбыл облысы Сарысу ауданында дүниеге келген. Білімі жоғары. Абай атындағы Қазақ ұлттық педагогикалық университетін бітірген.

Еңбек жолын 2005 жылы «Рахат» Қазақ-Австрия бірлескен кәсіпорны АҚ-да байланыс орталығының қызметкері болып бастаған. Әр жылдары «Даму» кәсіпкерлікті дамыту қоры» АҚ субсидиялау департаментінің менеджері, Астана қалалық сотының бас маманы, ҚР Премьер-Министрі Кеңсесінің құрылымында жұмыс істеді.

Сонымен бірге Шымкент қаласы әкімінің аппарат басшысы, көмекшісі, Шымкент қаласы әкімі аппараты басшысының орынбасары — хатшылық меңгерушісі, Шымкент қаласы Энергетика және коммуналдық шаруашылық басқармасының басшысы, ҚР Индустрия және инфрақұрылымдық даму министрлігі Көлік комитеті төрағасының орынбасары, төрағасы қызметтерін атқарды.

2023 жылдың қараша айынан бастап бүгінгі күнге дейін ҚР Көлік министрлігі Автомобиль көлігі және көлік бақылау комитетінің төрағасы лауазымында еңбек етіп келді.

Қанат Жолтайұлы Балтабеков Қаржы министрлігі Мемлекеттік кірістер комитеті Батыс Қазақстан облыстық мемлекеттік кірістер департаментінің басшысы болды. 

Қанат Жолтайұлы 1996 жылы Қазақ мемлекеттік аграрлық университетін «Экономист-бухгалтер» мамандығы бойынша, 2005 жылы Д. Қонаев атындағы университетін «Заңгер» мамандығы бойынша бітірген.

Еңбек қызметін 1996 жылы Алматы қалалық салық инспекциясында 1-санатты маман лауазымынан бастаған. Салық инспекторы, бөлім басшысы, аудандық басқарма басшысы, сондай-ақ Алматы қаласы мен Қарағанды облысы бойынша Мемлекеттік кірістер департаменті басшысының орынбасары қызметтерін атқарған.

2022 жылдың сәуір айынан бастап Астана қаласы бойынша Мемлекеттік кірістер департаменті басшысының орынбасары қызметінде болды.

Ал Солтүстік Қазақстан облысы бойынша мемлекеттік кірістер департаментін Аманжол Жақанов басқарады. 

Аманжол Жақанов 1974 жылы Қостанай облысы Федоров ауданы Мирный елді мекенінде дүниеге келген.
1995 жылы Қостанай ауыл шаруашылығы институтын «Экономист-ұйымдастырушы» мамандығы бойынша, 2000 жылы Мәскеу қаласында Қазіргі заманғы гуманитарлық институтты «Құқықтану» мамандығы бойынша тәмамдаған.

1997 жылы еңбек жолын ҚР Қаржы министрлігі Салық комитеті Қостанай облысы бойынша Салық комитетінің жеке тұлғаларға салық салу бөлімінің 1-санатты маманы болып бастайды. Әр жылдары бас маман, бөлім басшысы, аудандық салық басқармаларының басшысы, сондай-ақ Қостанай және Батыс Қазақстан облыстары бойынша Мемлекеттік кірістер департаменттері басшысының орынбасары және басшысы қызметтерін атқарған.

2020 жылдан бастап осы тағайындауға дейін Ақтөбе облысы бойынша Мемлекеттік кірістер департаментін басқарды. 

Алматы облыстық мемлекеттік кірістер департаментінің басшысы лауазымына Шыңғыс Әнуарбеков тағайындалды. 

Шыңғыс Әнуарбеков еңбек жолын 1998 жылы Алматы қаласы Түрксіб ауданы бойынша Салық комитетінде маман болып бастаған. Бұған қоса әр жылдары Алматы қаласы, Жамбыл, Ақмола және Қостанай облыстары бойынша салық департаменттерінде басшылық қызметтер атқарды. 2022 жылдың тамыз айынан бастап бүгінге дейін Астана қаласы бойынша Мемлекеттік кірістер департаментін басқарған.

Павлодар облыстық қылмыстық-атқару жүйесі департаментінің бастығы қызметіне әділет полковнигі Дәулет Рахымбеков кірісті.

Дәулет Рахымбеков Ақмола облысында туған. 1998 жылы Гумилев атындағы Еуразия ұлттық университетін заңгер мамандығы бойынша тәмамдаған. Кейінірек ҚР ІІМ-нің Б.Бейсенов атындағы Қарағанды академиясын бітірген. 

Әскери борышын өтеген соң 1993-1998 жылдар аралығында Ақмола облысының ішкі істер саласында қызмет етіп, кейінірек Астана қаласы ішкі істер басқармасында түрлі лауазымдарды атқарған. 2005-2006 жылдары — Астана қаласы ішкі істер департаменті Сарыарқа аудандық ішкі істер басқармасының бастығы, 2006-2020 жылдары ҚР ІІМ-нің орталық аппаратында түрлі лауазымдарда қызмет еткен.

ҚР ІІМ Қылмыстық-атқару жүйесі комитетінің өзіндік қауіпсіздік басқармасының бастығы, Нұр-Сұлтан қаласы бойынша ҚАЖД бастығының орынбасары, Астана қаласы бойынша ҚАЖД бастығы лауазымдарында болған.

Руслан Уразбаев Қылмыстық-атқару жүйесінің Маңғыстау облысы бойынша департаментінің бастығы болды. 

Руслан Уразбаев Ақтөбе облысының тумасы, әділет полковнигі. 1998 жылы ҚР ІІМ-нің Б. Момышұлы атындағы заң колледжін бітірген. 2002 жылы Орталық Азия инновациялық университетін «Құқық қорғау қызметі» мамандығы бойынша тәмамдаған.

Еңбек жолын Ақтөбе облысы ІІБ-нің № 6 түзету колониясында жедел бөлімінің жедел уәкілі болып бастаған.

Қарағанды облысы бойынша ҚАЖ департаменті бастығының орынбасары, ҚР ІІМ ҚАЖК-нің Жедел басқармасының бастығы, Маңғыстау облысы бойынша ҚАЖ департаменті бастығының орынбасары, Ақтөбе облысы бойынша ҚАЖ департаментінің бастығы, Маңғыстау облысы бойынша ҚАЖ департаментінің бастығы.

Қылмыстық-атқару жүйесінде және құқық қорғау органдарында 25 жылдан астам тәжірибесі бар.

Шаймерден Есенкелдиев Ақтөбе облыстық қылмыстық атқару жүйесі департаментінің бастығы болып тағайындалды.

Ол бұған дейін Қызылорда облысында дәл осы қызметті атқарды. 

Шаймерден Есенкелдиев Түркістан облысында дүниеге келген. Қызмет жолын Шымкент қалалық полиция басқармасында бастады. 2003 жылдан бастап Оңтүстік Қазақстан облысындағы қылмыстық атқару жүйесі департаментінде еңбек етіп, түрлі қызметті атқарды. 

2018-2020 жылдар аралығында Шымкент қаласы қылмыстық атқару жүйесі департаменті бастығының орынбасары болды.

2020 жылдан бастап күні бүгінге дейін Қызылорда облыстық қылмыстық атқару жүйесі департаментінің бастығы қызметін атқарды. Қазан айынан бастап Ақтөбе облыстық қылмыстық атқару жүйесі департаментінің бастығы болып тағайындалды. 

Көлік министрлігі Автомобиль жолдары комитеті төрағасының бұйрығымен «Қазақстан жол ғылыми-зерттеу институты» акционерлік қоғамының («ҚазжолҒЗИ») президенті қызметіне Біржан Бисекенұлы Канешев тағайындалды.

Біржан Бисекенұлы Саратов политехникалық институтын мен ҚР Президенті жанындағы Ұлттық жоғары мемлекеттік басқару мектебін бітірген. Сонымен қатар, АҚШ-тағы Массачусетс технологиялық институтынан іскерлік басқару магистрі (MBA) дәрежесін алған.

Еңбек жолын 1988 жылы көлік кәсіпорнында бастаған. Әр жылдары көлік және коммуникация, цифрландыру, халықаралық қатынастар салаларында мемлекеттік және саяси лауазымдарды атқарды.

Сондай-ақ Батыс Қазақстан мен Маңғыстау облыстарының жергілікті атқарушы органдарында және «Самұрық-Қазына» АҚ, «Kazakh Invest» АҚ Ұлттық компанияларында басшылық қызметтерде болған.