Қазақстанда әскерден босату туралы шешімнің күші жойылуы мүмкін

Қазақстанда азаматтарды мерзімді әскери қызметке шақырудан босату туралы шешімдер қалай тексерілетіні нақтыланды. Аудандық комиссия шешімі енді облыстық деңгейде тексеруден өтуі тиіс. Кей жағдайларда әскерге шақырылушы қайта медициналық куәландыруға жіберілуі мүмкін, деп хабарлайды Tengrinews.kz.

Өзгерістер Азаматтарды әскери қызметке шақыруды ұйымдастыру және өткізу қағидаларына енгізілді.

Қалай жұмыс істейді?

Алдымен аудандық немесе қалалық шақыру комиссиясы әскерге шақырылушының денсаулық жағдайын қарап, шешім қабылдайды. Мысалы, медициналық көрсеткіштер бойынша оны шақырудан босата алады.

Бұдан әрі босату туралы шешім облыстық деңгейде қосымша тексерілуі міндетті. Астана, Алматы және Шымкентте мұндай тексеруді қалалық шақыру комиссиясы жүргізеді.

Ол үшін жоғары тұрған комиссияға келесі құжаттар беріледі:

әскерге шақырылушының есепке алу картасы; медициналық куәландыру картасы; анализдер мен басқа да медициналық зерттеулер нәтижесі.

Тексеруден кейін екі негізгі нұсқа болуы мүмкін.

Бірінші: облыстық медициналық комиссия әскерге шақырылушыны қызметтен босатумен келіседі. Онда аудандық комиссия шешімі күшінде қалады.

Екінші: комиссияда диагнозға, зерттеулерге немесе дәрігерлер қорытындысына қатысты сұрақтар туындайды. Мұндай жағдайда әскерге шақырылушы қайта медициналық куәландыруға жіберілуі мүмкін.

Егер аудандық немесе қалалық комиссия азаматты заңбұзушылықтармен босатқаны анықталса, жоғары тұрған шақыру комиссиясы бұл шешімнің күшін жоя алады.

Қайта тексеруден кейін қандай шешім қабылдануы мүмкін?

Бақылау медициналық тексеруінің қорытындысы бойынша азаматты:

жарамды деп танып, қызметке шақыруы; денсаулық жағдайына байланысты уақытша кейінге қалдыруы; бейбіт уақытта шақырудан босатуы; әскери міндеттіліктен толық босатып, әскери есептен шығаруы мүмкін.

Осылайша, аудандық комиссия берген босату туралы шешім автоматты түрде түпкілікті болып саналмайды. Ол міндетті түрде облыстық деңгейде расталуы тиіс.

Бұған дейін Қорғаныс министрлігі қазақстандықтарға "әскерден босату" және "ақ билет" алу бойынша қызмет көрсетуді жарнамалайтындар туралы ескерткен болатын. Ведомство кейінге қалдыру немесе босату туралы шешімді шақыру комиссиясы ғана қабылдайтынын, ал жалған медициналық құжаттар мен ойдан шығарылған диагноздарды пайдалану қылмыстық жауапкершілікке әкеп соғуы мүмкін екенін атап өтті. Бұл туралы Tengrinews.kz толығырақ мына жерде жазды.

Google News арқылы жаңалықтарымызды қадағалаңыз

Жазылу