Қазақстанда интернетке бір триллион теңге инвестиция салынды

Соңғы үш жылда Қазақстанның телекоммуникация саласына бір триллион теңгеден астам инвестиция құйылды. Еліміз 2027 жылдың соңына дейін интернетпен 100% қамтуды көздеп отыр, деп хабарлайды Egemen.kz. 

Жасанды интеллект және цифрлық даму министрі Жаслан Мәдиев үкімет отырысында мәлім еткендей, қазір елімізде 20 миллионнан астам ұялы және 3,7 миллион тіркелген байланыс абоненттері бар. Интернеттің орташа жылдамдығы секундына 94 мегабитке жетті.

«Биылғы жылы интернет-трафикті тұтыну айтарлықтай өсті. Бұл өткен жылмен салыстырғанда екі есе жоғары болады деп күтеміз», деді Жаслан Мәдиев.

Министр қосылу жылдамдығы секундына 100 мегабиттен асып, талшықты-оптикалық желі ауылдық елді мекендердің 90 пайызына жететінін хабарлады.

2027 жылдың соңына дейін 2500-ден астам ауыл жоғары жылдамдықты интернетке қосылады.