Қазақстанда корпоративтік табыс салығының түсімі 15,7% ға өсті

Қазақстан Премьер-министрі Олжас Бектенов Қаржы және Ұлттық экономика министрліктерінің, сондай-ақ «Атамекен» ұлттық кәсіпкерлер палатасы басшылығының қатысуымен кәсіпкерлікті дамыту мәселелері жөнінде кеңес өткізді, – деп хабарлайды Aikyn.kz сайты.

Кеңесте кәсіпкерлік саласының қазіргі ахуалы, салық реформасының алдын ала нәтижелері, бизнес субъектілерінің қызметін әділ реттеу шаралары, сондай-ақ іскерлік белсенділік пен салалық және өңірлік көрсеткіштер қаралды.

Қаржы министрі Мәди Такиевтің айтуынша, биылғы жылдың бірінші жартыжылдығында республикалық бюджетке корпоративтік табыс салығынан түсетін түсімдер өткен жылдың сәйкес кезеңімен салыстырғанда 15,7%-ға артқан. Әсіресе қаржы секторы мен өңдеу өнеркәсібінде оң өсім байқалған.

Сондай-ақ бірінші жартыжылдықтың қорытындысы бойынша шағын және орта бизнес субъектілерінің саны шамамен 550 мыңға көбейді. Қаржы министрлігінің мәліметінше, бұл өсім өзін-өзі жұмыспен қамтыған азаматтардың қызметін заңдастыру жұмыстарының нәтижесінде қалыптасқан. Бұл санаттағы азаматтар әлеуметтік төлемдерді төлегенімен, салықтан босатылады.

Сонымен қатар жалдамалы қызметкері жоқ 260 мыңға жуық шағын және орта бизнес субъектісі қызметін тоқтатқан. Үкімет мұны бизнесті жасанды түрде бөлшектеу тәжірибесінің айтарлықтай қысқаруымен байланыстырды.

Салық кодексіне енгізілген өзгерістерге сәйкес, 2026 жылғы 1 қаңтардан бастап корпоративтік табыс салығы бойынша аванстық төлемдерді төлеу шегі 325 мың АЕК-тен (1,4 млрд теңге) 600 мың АЕК-ке (2,6 млрд теңге) дейін ұлғайтылды. Соның нәтижесінде талапқа сай келетін кәсіпорындар корпоративтік табыс салығы бойынша түпкілікті есеп айырысуды жылына бір рет жүргізеді.

Осы өзгеріске байланысты 2026 жылдың қорытындысы бойынша түсетін корпоративтік табыс салығының бір бөлігі 2027 жылғы республикалық бюджетте көрініс табады. Бұған дейін бұл қаражат есепті жыл ішінде ай сайын түсіп келген. Үкіметтің мәліметінше, жаңа тәртіп бизнес үшін есептілік жүктемесін азайтып, айналым қаражатын сақтауға мүмкіндік береді.

Жиында «Атамекен» ҰКП төрағасы Қанат Шарлапаев кәсіпкерлер атынан бірқатар ұсыныс айтып, саладағы өзекті мәселелерді көтерді. Сондай-ақ Ұлттық экономика бірінші вице-министрі Азамат Әмрин пікір білдірді.

Кеңес қорытындысында Олжас Бектенов экономиканың тұрақты өсімін қамтамасыз ету үшін мемлекет пен бизнес арасындағы өзара іс-қимылды күшейтуді тапсырды. Сонымен қатар Қаржы және Ұлттық экономика министрліктеріне «Атамекен» ҰКП-мен бірлесіп, кәсіпкерлік сектордың жай-күйіне салалық және өңірлік бөліністе ай сайын кешенді талдау жүргізіп, оның нәтижелерін тұрақты түрде Үкіметке ұсынып отыруды міндеттеді.