Қазақстанда медициналық ұйымдарға жаңа бақылау жүйесі енгізіледі

Қазақстан Республикасы Денсаулық сақтау министрлігі медициналық ұйымдарды аккредиттеу жүйесін одан әрі жетілдіруге және медициналық көмектің сапасын арттыруға бағытталған денсаулық сақтау саласындағы аккредиттеуден кейінгі мониторинг қағидаларын енгізуді жоспарлап отыр, – деп хабарлайды Aikyn.kz сайты.

Аккредиттеуден кейінгі мониторинг медициналық ұйымдар мен аккредиттелген құрылымдардың аккредиттеуді алғаннан кейін белгіленген стандарттарға сәйкестігін бағалау үшін жүргізіледі.

Бүгінде Қазақстанда аккредиттеу саласындағы қызметті жүзеге асыратын 19 ұйым, сондай-ақ ТМККК және МӘМС жүйесінде медициналық қызмет көрсетуші 699 медициналық ұйым аккредиттелген.

Тиісті бұйрықтың жобасымен мониторинг жүргізу тәртібін нақтылау ұсынылады.

Осылайша, жоспарлы аккредиттеуден кейінгі мониторинг үш жылда бір рет, бірақ аккредиттеу туралы куәлік алғаннан кейін алты айдан ерте емес жүргізілетін болады. Бұл ретте мониторинг жоспары тиісті ұйымдардың ресми сайттарында жыл сайын 1 ақпанға дейін жарияланатын болады.

Мониторинг жоспарлы және жоспардан тыс тәртіппен жүргізілетін болады. Жоспардан тыс тексерулер, мысалы, азаматтардың өтініштері, мемлекеттік органдардың ақпараты немесе бұқаралық ақпарат құралдарында қосымша тексеруді қажет ететін фактілер туралы хабарламалар түскен кезде мүмкін болады.

Жоба сонымен қатар мемлекеттік орган мен аккредиттеуші ұйымдардың арасында өкілеттіктерді бөлуді нақтылайды. Медициналық ұйымдардың мониторингінің көп бөлігін аккредиттеуші органдар жүргізеді, ал мемлекеттік орган іріктеп бақылауды жүзеге асырады.

Бұдан басқа, мониторинг жүргізу үшін тәуелсіз сарапшылар мен бейінді мамандар тартылатын болады, бұл бағалаудың объективтілігін қамтамасыз етуге мүмкіндік береді.

Сәйкессіздіктер анықталған жағдайда медициналық ұйымдарға ескертулерді жою үшін уақыт беріледі. Мониторингтің қорытындысы бойынша аккредиттеу стандарттарына сәйкестігі туралы қорытынды беріледі.

Ұсынылған өзгерістер аккредиттеу жүйесінің ашықтығын арттыруға, сапа мәдениетін дамытуға және медициналық ұйымдарды басқаруды одан әрі жетілдіруге бағытталған.