Қазақстанда құрылыс сапасы мен қауіпсіздігін арттыру: сала қатысушыларына қойылатын талаптар қатаңдатылады

Министр атап өткендей, құрылыс саласы цифрлық технологияларды енгізуге көшіп, құрылыс өнімдерінің толық өмірлік циклі – жобалаудан бастап пайдалануға беру және утилизацияға дейін – есепке алынады.

"Жаңа Құрылыс кодексі 2026 жылғы 9 қаңтарда қабылданып, 1 шілдеден бастап күшіне енеді. Ол осы тәсілдерді бекітіп, заманауи талаптарды ескере отырып, саланы әрі қарай дамытуға нормативтік негіз қалыптастырады. Құрылыс сапасы мен қауіпсіздігін арттыру үшін сала қатысушыларына қойылатын талаптар қатаңдатылады: лицензияланған тұлғалар электрондық реестр арқылы автоматты тексеруден өтеді, сондай-ақ инженерлерді кезең-кезеңімен сертификаттау енгізіледі", – деді министр.

Нормативтік базаны жаңарту үшін Ұлттық техникалық нормалау институты құрылады – бұл құрылыс нормаларын әзірлеу мен жаңартудың бірыңғай орталығы болып, халықаралық стандарттармен үйлестіріледі.

"Маңызды жаңалықтардың бірі – барлық әзірленетін және түзетілетін жобаларды, соның ішінде егжей-тегжейлі жоспарлау жобасын міндетті сараптамадан өткізу. Бұл қателіктерді ерте кезеңде анықтауға, сыбайлас жемқорлық тәуекелдерін азайтуға және құжаттардың ашықтығын қамтамасыз етуге мүмкіндік береді. Сонымен қатар, кодекс егжей-тегжейлі жоспарлау жобаларын түзетуге екі жылда бір реттен артық рұқсат бермейді, бұл құрылыс жобаларын тұрақты жүзеге асыруға ықпал етеді", – деді министр.

Жаңа кодексте сейсмикалық қауіпсіздікке арналған бөлек тарау енгізіліп, тәуекелдерді азайтуға міндетті талаптар бекітілген.

"Бұл шаралар тәуекелдерді алдын алу және аумақтардың табиғи апаттарға төзімділігін арттыруға мүмкіндік береді", – деп атап өтті Ерсайын Нағаспай.

Бұған дейін министр елімізде тұрғын үй құрылысының қарқыны туралы да мәлімет берген еді.