Қазақстанда ресми жұмыспен қамтылғандар саны 150 мың адамға артты

Еңбек және халықты әлеуметтік қорғау министрлігінің мәліметінше, Қазақстанда еңбек нарығындағы оң үрдіс сақталуда, – деп хабарлайды Aikyn.kz. 2026 жылдың бірінші тоқсанының қорытындысы бойынша, жұмыспен қамтылғандар саны 9 млн 392 мың адамға жетіп, өткен жылдың сәйкес кезеңімен салыстырғанда 108,5 мың адамға артты. Өсімнің негізгі үлесі еңбек шарты негізінде жұмыс істейтін жалдамалы жұмыскерлер санының көбеюі есебінен қамтамасыз етілді. Олардың саны 7 млн 140,9 мыңнан 7 млн 290,4 мың адамға дейін өсіп, шамамен 150 мың адамға ұлғайды.

Ресми жұмыспен қамтудың артуы – экономиканың тұрақтылығын айқындайтын маңызды көрсеткіштердің бірі. Өйткені еңбек шарты бойынша жұмыс істейтін азаматтар әлеуметтік және еңбек кепілдіктерінің толық пакетімен қамтылады. Олардың қатарында міндетті әлеуметтік сақтандыру, зейнетақы жарналарының аударылуы, жыл сайынғы ақылы еңбек демалысы, еңбекке уақытша жарамсыздық бойынша төлемдер және еңбек құқықтарының қорғалуы бар.

Сонымен қатар тұрақтылығы төмен жұмыспен қамту түрлерінің үлесі де азайып келеді. Бір жыл ішінде өзін-өзі жұмыспен қамтығандардың саны 2 млн 142,5 мыңнан 2 млн 101,6 мың адамға дейін қысқарды. Ал тәуелсіз жұмыскерлердің саны 357,2 мыңнан 326,6 мың адамға дейін, яғни 30 мыңнан астам адамға азайды. Бұл азаматтардың біртіндеп экономиканың ресми секторына ауысып, әлеуметтік кепілдіктер жүйесімен қамтылуының кеңейіп келе жатқанын көрсетеді.

Оң өзгерістер жұмыссыздық көрсеткіштерінен де байқалады. Жұмыссыздар саны 446 мың адамға дейін төмендеп, жұмыссыздық деңгейі 4,5% деңгейінде сақталды. Жастар арасындағы жұмыссыздық деңгейі 3%-ды құрады.

Ресми жұмыспен қамтуды арттыруда еңбек нарығының цифрлық инфрақұрылымын дамыту маңызды рөл атқаруда. Электрондық еңбек биржасы жұмыс берушілерге қажетті мамандарды жедел табуға, ал азаматтарға бос жұмыс орындары туралы ақпаратқа жедел қол жеткізуге, кәсіптік оқудан өтуге және жұмыспен қамтуға жәрдемдесудің мемлекеттік шараларын пайдалануға мүмкіндік береді.

Еңбек нарығының дамуына белсенді жұмыспен қамту шаралары да қосымша серпін беруде. Биылғы 1 шілдедегі жағдай бойынша, мемлекет пен жұмыс берушілердің қолдауымен 249 595-тен астам адам жұмысқа орналасып, оның ішінде 96 415 азамат тұрақты жұмысқа тұрды. Бұл жалдамалы жұмыспен қамтудың өсуі еңбек нарығы статистикасымен ғана емес, сапалы жұмыс орындарын құруға бағытталған мемлекеттік саясаттың нақты нәтижелерімен де расталып отырғанын көрсетеді.

Еңбек және халықты әлеуметтік қорғау министрлігінің мәліметінше, алдағы кезеңде еңбек нарығын дамыту жұмыстары жұмыспен қамту сапасын арттыруға, заманауи жұмыс орындарын құруға, адами капиталды дамытуға және азаматтардың ресми еңбекке орналасу мүмкіндіктерін кеңейтуге бағытталады.

Ресми жұмыспен қамтудың нығаюы – экономикалық өсімнің ғана емес, халықтың әлеуметтік қорғалуының да маңызды көрсеткіші. Азаматтар ресми түрде жұмыспен қамтылған сайын олардың мемлекеттік әлеуметтік кепілдіктерге, зейнетақы жүйесіне және еңбек құқықтарын қорғау тетіктеріне қолжетімділігі арта түседі.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.