Қазақстанда ШОБ субъектілерінің саны артты

Қазақстанда кәсіпкерлер саны артып келеді. 1 желтоқсандағы мәлімет бойынша, елімізде 2 млн 200 мыңға жуық шағын және орта бизнес субъектісі тіркелген.

Бұл өткен жылмен салыстырғанда шамамен 130 мыңға көп. ШОБ-тың ел экономикасына қосқан үлесі қазірдің өзінде 40%-ға жуықтады.

Бұл қамырдан бірнеше сағаттан кейін көбі сүйіп жейтін «Денсаулық» наны пісіріледі. Ал содан соң Инна Цариценская тоқаштар мен кекстерге арнап тағы қамыр илейді. Ол нан зауыты ашылған күннен бастап осында жұмыс істейді.

Инна Цариценская, нан пісіруші:

- Жұмыс әрине, өте жауапты. Өйткені бүкіл процесс маған байланысты. Егер қамырды дұрыс илесем, нан да сапалы болып шығады. Мұнда жұмыс істеген өте жеңіл, себебі бәрі автоматтандырылған. Ұн автоматты түрде беріледі. Біз тек шикізатты жинаймыз. Қалғанын қуатты машиналар араластырып шығады.

Нан зауыты жыл басында іске қосылды. Қазір мұнда тәулігіне 15 тоннаға дейін нан-тоқаш өнімдері пісіріледі. Кәсіпорын құрылысы мен заманауи жабдықтарды сатып алуды Өнеркәсіпті дамыту қоры қаржыландырған.

Мадина Жақыпова, кәсіпкер:

- Зауыт құрылысына және жабдықтар сатып алуға бізге жылдық  9 пайызбен 1,8 млрд теңге бөлінді. Жабдықтар Италия, Болгария және Ресейден әкелінді. Біз мектептерді, асханаларды және дүкендерді өніммен қамтамасыз етіп отырмыз. Қазіргі уақытта зауыт 50 пайыз қуаттылықта жұмыс істеп тұр. Алдағы уақытта  тәулігіне 25 тоннаға шығуды жоспарлап отырмыз.

Сонымен қатар жұмыс орнын кеңейту де жоспарда бар. Қазір кәсіпорында 60 адам еңбек етеді. Нан зауытынан бөлек, сүт зауыты мен көкөніс қоймасының құрылысы да қаржыландырылды. Жалпы биыл Өнеркәсіпті дамыту қоры 800 млрд теңгеге 293 жобаға қолдау көрсетті. Нәтижесінде 13 жаңа кәсіпорын ашылды.

Азат Абайділдин, «Өнеркәсіпті дамыту қоры» АҚ Басқарма төрағасының орынбасары:

- Біз кәсіпкерлерге негізгі қарыз бен сыйақы бойынша жеңілдік кезеңін, яғни «каникулдар» ұсынамыз. Ол зауыт іске қосылғанға дейінгі уақыт пен жобалық қуаттылыққа шығу үшін тағы жарты жылды қамтиды. Қазіргі таңда біздің портфеліміз 2,6 трлн теңгені құрайды, оның ішінде проблемалық жобалардың үлесі небәрі 0,5%. Бұл көрсеткіш қолдау тапқан жобалардың сәтті жүзеге асып жатқанының дәлелі.

Өнеркәсіпті дамыту қорынан бөлек, елімізде шағын және орта бизнес субъектілерін қолдауға бағытталған басқа да институттар жұмыс істейді. Олардың барлығы «Байтерек» холдингінің құрамына кіреді. Соңғы үш жылда 500 млрд теңгеге жуық қаражат бөлініп, несиелендірудің жалпы көлемі 700 млрд-қа жетті. Отандық өндірушілерді қолдау алдағы уақытта да жалғасады. Бұл туралы Үкіметте Премьер-министрдің орынбасары – Ұлттық экономика министрі Серік Жұманғарин мәлімдеді. Жаңа жылдан бастап «Іскер аймақ» бағдарламасы іске қосылмақ.

Серік Жұманғарин,  ҚР Премьер-министрінің орынбасары – Ұлттық экономика министрі:

- Бағдарлама шағын және орта кәсіпкерлікті дамытуға бағытталған. Ол технологиялық тұрғыдан қарапайым бағыттарға, соның ішінде ауыл шаруашылығы шикізатын, теріні қайта өңдеуге, шағын наубайханаларға, сүт және ет өнімдеріне, тамақ өндірісіне, ағаш өңдеу, жиһаз цехтарына, құрылыс материалдарын шығаруға және қолөнер саласына басымдық береді. Бұл жергілікті базалық құн тізбегін және ұзақ мерзімді экономикалық тиімділікті қалыптастыруға мүмкіндік береді.

Бағдарлама аясында өңірлерге 400 млрд теңге бағытталады. Кәсіпкерлерге 200 млн теңгеге дейін 9 пайыздық жеңілдетілген несие ұсынылады. Кепілзат жетіспеген жағдайда, мемлекет қарыз сомасының 85 пайызына дейін кепілдік береді. Сонымен қатар бизнес өкілдері дайын ғимараттарға, жер учаскелеріне және инженерлік инфрақұрылымға қол жеткізе алады.

Авторлары: Наргиз Бекмағанбетова, Гүлнар Хасан, Руслан Әлиев, Өрден Жарқын