Қазақстанда мейрамхана мен кафе саны күрт артты

2026 жылдың І тоқсанында елімізде қоғамдық тамақтану саласы айтарлықтай өсім көрсетті, – деп хабарлайды Aikyn.kz сайты.

Ұлттық статистика бюросының мәліметінше, осы кезеңде 15 мейрамхана пайдалануға беріліп, бұл соңғы жеті жылдағы ең жоғары көрсеткішке айналды. 2025 жылдың сәйкес кезеңімен салыстырғанда өсім шамамен 50%-ды құрады.

Жаңа және жаңғыртылған мейрамханалардағы жалпы орын саны 4,3 мыңға жетті. Бұл өткен жылмен салыстырғанда екі есеге жуық көп және соңғы сегіз жылдағы І тоқсан үшін рекордтық көрсеткіш. Алайда статистикаға реконструкцияланған нысандар да кіретіндіктен, бір мейрамхананың орташа сыйымдылығын нақты анықтау қиын.

Жалпы 4,3 мың орынның құны 9,5 млрд теңгені құрады. Орта есеппен бір орынға 2,2 млн теңгеден келеді. Ең жоғары көрсеткіш Шығыс Қазақстан облысында (8 млн теңге) және Түркістан облысында (7,9 млн теңге) тіркелген.

Өңірлер арасында орын саны бойынша Жамбыл облысы көш бастап тұр – 1,2 мың орын. Одан кейін Алматы облысы (1,1 мың) және Атырау облысы (0,7 мың) орналасқан. Республикалық маңызы бар қалалар ішінде тек Шымкентте 0,4 мың жаңа орындық мейрамхана ашылған.

Сонымен қатар кафе сегментінде де өсім байқалады. І тоқсанда 21 жаңа кафе іске қосылып, ондағы орын саны 2,5 мыңға жетті. Бұл өткен жылмен салыстырғанда 51%-ға артық және соңғы 10 жылдағы І тоқсан бойынша рекордтық көрсеткіш.