Қазақстанда Starlink жүйесінен бас тартқан мектептер көбейді

— Қазақстанның білім беру саласын цифрландыруда Starlink спутниктік жүйесін енгізу маңызды кезең болды. Бастапқыда пилоттық жоба аясында 2 мыңға жуық мектепті қамту жоспарланғанымен, бұл көрсеткіш уақыт өте келе өзгеріске ұшырады. Бұл өзгеріс еліміздегі ресми байланыс операторларының жұмысының жандануымен және инфрақұрылымның дамуымен тікелей байланысты, — делінген министрліктің Kazinform агенттігіне берген жауабында.

Атап айтқанда, көптеген елді мекенде талшықты-оптикалық байланыс желілерінің (ТОБЖ) тартылуы және байланыс аясының кеңеюі нәтижесінде кейбір мектептер дәстүрлі жоғары жылдамдықты интернетке қосылу мүмкіндігін алды.

— Осыған байланысты қазіргі кезде пилоттық жоба аясында Starlink жүйесімен жұмыс істеп тұрған мектептер саны 1 068.

Бұл жүйе өзінің тиімділігін толықтай дәлелдеді: интернет жылдамдығы төмен немесе мүлдем жоқ шалғайдағы мектептер 150–200 Мбит/с деңгейіндегі сапалы байланысқа қол жеткізді. Бұл оқушылар мен мұғалімдердің заманауи білім беру платформаларын кедергісіз қолдануына жол ашты, — деп аталып өткен ведомство ақпаратында.

Еске салсақ, 2024 жылы жазда елдегі екі мыңға жуық мектеп Starlink интернетіне қосылғаны мәлім болды.