Қазақстанда тіркелмеген және сапасы расталмаған дәрі дәрмектерді сатуға тыйым салынған

Қазақстан заңнамасына сәйкес, мемлекеттік тіркеуден өтпеген және сапасы расталмаған дәрілік заттар мен медициналық бұйымдарды сатуға жол берілмейді, – деп хабарлайды Aikyn.kz сайты.

Қазақстан Республикасының «Халық денсаулығы және денсаулық сақтау жүйесі туралы» кодексінің 233-бабы  4-тармағына сәйкес, мемлекеттік тіркеуден өтпеген, сәйкестік сертификатымен расталмаған немесе денсаулық сақтау саласындағы заңнама талаптарына сәйкес келмейтін дәрілік заттар мен медициналық бұйымдарды көтерме және бөлшек саудада өткізуге тыйым салынады.

Сондай-ақ Денсаулық сақтау министрінің 2020 жылғы 17 қыркүйектегі № ҚР ДСМ-104/2020 бұйрығымен бекітілген қағидаларға сәйкес, дәрілік заттар мен медициналық бұйымдарды тек фармацевтикалық қызметке лицензиясы бар субъектілерден сатып алып, сапасын белгіленген тәртіппен бағалағаннан кейін ғана сатуға рұқсат етіледі.

Қолданыстағы талаптарға сәйкес, дәрі-дәрмектерді кәмелетке толмағандарға сатуға да тыйым салынған. Сонымен қатар барлық дәрілік заттар мен медициналық бұйымдар міндетті түрде сапаны бағалау рәсімінен өтуге тиіс.

Мамандардың айтуынша, заң талаптарына қарамастан, интернет арқылы дәрі-дәрмек саудасының кеңеюі кәмелетке толмағандардың оларды бақылаусыз сатып алу қаупін сақтап отыр.