Қазақстанда ұшақтардағы интернет қазан айында іске қосылуы мүмкін

Қазақстанда интернет қосылған алғашқы ұшақтар қазанда пайда болуы мүмкін. Бұл туралы Цифрлық даму, инновациялар және аэроғарыш өнеркәсібі министрлігі телекоммуникация комитетінің төрағасы Дамир Сейсембеков айтты, деп хабарлайды Tengri Travel.

Қай компаниялар интернетке қосыла алады?

Тамызда министрлік Air Astana және америкалық Viasat компаниясының өкілдерімен кездесу өткізіп, бортта Wi-Fi іске қосу мәселесін талқылады.

"Мемлекет тарапынан қажетті заңнамалық түзетулер қабылданды. Маусымда Президенттің жарлығы шықты, сондықтан ұшақтарда интернетті іске қосуға құқықтық кедергі жоқ", - деді Сейсембеков.

Әуе кемелерін желіге қосу үшін Viasat және OneWeb компанияларының шешімдері қарастырылып жатыр.

"Интернетке қолжетімділігі бар алғашқы борттар қазанда пайда болады деп жоспарланып отыр. Толық ақпарат кейінірек ұсынылады", - деп толықтырды ол.

Wi-Fi билет құнына қосыла ма, әлде жолаушылар бөлек төлей ме, әзірге белгісіз. Әртүрлі нұсқа, соның ішінде бонустар мен адалдық бағдарламаларын пайдалану мүмкіндігі қарастырылып жатыр. Соңғы шарттарды әуекомпанияның өзі жариялауы тиіс.

Бұған дейін оңтүстіккореялық Korean Air және Asiana Airlines әуекомпаниялары 15 қыркүйектен бастап жекелеген ұшақтарда Starlink арқылы тегін интернет қосатынын жазған болатынбыз. Қызмет барлық класстағы жолаушыларға бөлек пакет сатып алмай-ақ қолжетімді болады. Ал Қазақстанда шарттар өзгеше болуы мүмкін.

Бұған дейін Азаматтық авиация комитеті мемлекет тасымалдаушылар мен спутниктік интернет жеткізушілері арасындағы келіссөздерге қатыспайтынын түсіндірген болатын. Әуеккомпаниялар желіге қосылу мерзімін, қызмет құнын және қолжетімділік шарттарын өз бетінше айқындайды.

Бізді Google-дың негізгі дереккөздер тізіміне қосыңыз