Қазақстанда жаңа кен орындарын іздеу мақсатында 200 ұңғыма бұрғылау жоспарланып отыр

️АСТАНА, 7 қыркүйек – Sputnik. Атырауда өткен KAZDRILLING конференциясында Энергетика вице-министрі Ерлан Ақбаров мәлімдегендей, 2026 жылы барлау және бағалау бұрғылауының көлемі шамамен 80 ұңғымаға, ал 2027–2028 жылдары жылына 120 ұңғымаға дейін жетуі мүмкін.

Мұнай-газ әлеуеті жоғары, аз зерттелген шөгінді бассейндерге ерекше назар аударылды.

"Мұндай учаскелерді беру тәртібі жеңілдетілді. Өтінім келіп түскеннен кейін министрлік 10 жұмыс күні ішінде аукцион өткізеді. Жұмыс бағдарламасына сәйкес алғашқы үш жылда учаске аумағының кемінде 30 пайызында сейсмикалық барлау жұмыстарын жүргізу және кейіннен барлау ұңғымаларын бұрғылау көзделген", - дейді министрлік.

️Қазақстандық қамтуды дамытуға да ерекше мән берілді. Бүгінде елімізде қажетті өндірістік құзыреттер қалыптасқан. Атап айтқанда, Атыраудағы "Жігермұнайсервис" зауыты бұрғылау қашауларын, калибраторларды және басқа да бұрғылау жабдықтарын шығарады.
"Біздің міндетіміз – бұрғылау қызметтерінің тұрақты әрі бәсекеге қабілетті нарығын қалыптастыру. Нәтижесінде жаңа геологиялық ашылымдар жасалып, қорлар толықтырылып, отандық өндіріс дамып, білікті жұмыс орындары құрылып, салық түсімдері артуы тиіс", – деп атап өтті вице-министр.