Қазақстандағы мәслихат сайлауына рекордтық бюджет: 35,8 млрд теңге

Қазақстанда 29 қарашаға жоспарланған мәслихат депутаттарының сайлауын өткізуге 35,8 млрд теңге бөлінеді. Бұл туралы Орталық сайлау комиссиясы (ОСК) хабарлады.

ОСК мүшесі Михаил Бортниктің түсіндіруінше, бюджет көлемі Қаржы министрлігімен және Ұлттық экономика министрлігімен алдын ала келісілген.

«Осы іс-шараны өткізуге бөлінетін қаражат көлемі 35,8 млрд теңгені құрайды. Бұл сайлауды ауқымы жағынан Құрылтай сайлауымен салыстыруға болады», — деп нақтылады Михаил Бортник.

Оның айтуынша, сайлау науқанын ұйымдастыруға құрамында 13 110 адам бар 3 022 округтік комиссия жұмылдырылады. Бұрынғы жылдардағыдай, бюджет қаражатының басым бөлігі комиссия мүшелерінің еңбекақысын төлеуге жұмсалады.

Сайлау бюджеті қалай өзгерді?

Салыстыру үшін айта кетсек, 2023 жылы Мәжіліс пен барлық деңгейдегі мәслихат депутаттарының сайлауын қатар өткізуге 33,4 млрд теңге бөлінген. Ал 2021 жылы осындай сайлау қазынаға 15,3 млрд теңгеге түскен, 2016 жылы бұл сома шамамен 8 млрд теңгені құраған.

Ал 2026 жылғы 23 тамызда өткен Құрылтай депутаттарының сайлауын өткізуге үкімет мемлекеттік резервтен 34,3 млрд теңге жұмсаған.

Сайлау науқанының негізгі күндері мен көрсеткіштері

Кезектен тыс сайлау 29 қарашада өтеді. Қазақстандықтар еліміздегі 228 мәслихатқа 3 447 депутатты сайлауы керек. Оның ішінде:

668 депутат — облыстық мәслихаттарға;

626 депутат — қалалық мәслихаттарға;

2 153 депутат — аудандық мәслихаттарға сайланады.

Кандидаттарды тіркеу ресми түрде 1 қарашада аяқталды. Сол күні сайлауалды үгіт-насихат науқаны басталып, 27 қарашаны қоса алғанға дейін жалғасады. 28 қараша «тыныштық күні» деп жарияланды. Ал 29 қараша, жексенбі күні дауыс беру өтеді.

Тіркелген барлық кандидаттың аты-жөні көрсетілген тізім 3 қарашада жарияланады.

Кеше, 16:07