Қазақстандық әйел Instagram дағы жарнамадан кейін 7 миллион теңгесінен айырылды

Бас прокуратура азаматтарға кең таралған алаяқтық схемасы туралы ескертті. Қаскөйлер жоқ жобаларға инвестиция салуды ұсынып, оларды жарнамалау үшін танымал адамдардың қатысуымен дипфейк-видеоларды пайдаланады, деп хабарлайды Tengrinews.kz ведомствоға сілтеме жасап.

Әлеуетті құрбандарды тарту үшін қылмыскерлер TikTok, Instagram, YouTube сияқты танымал әлеуметтік желілер мен өзге де интернет-платформаларды пайдаланады. Онда олар атақты адамдардың дипфейк-видеоларын және аса жоғары пассивті табыс алуға уәде беретін жалған жасанды интеллект платформаларын құрады.

"Мысалы, Михаил Ломтадземен Kaspi AI, Илон Маскпен Quantum AI, Павел Дуровпен TON, сондай-ақ "Хабар24", "КТК" немесе "Бірінші арна" телеарналарының танымал жаңалық жүргізушілерімен бірге "ҚазМұнайГазға" немесе "Газпромға" халықтық инвестициялар туралы ұсыныстар", - деп хабарлады қадағалау органы.

Бас прокуратураның мәліметінше, кейінгі бір жарым айдың ішінде ғана еліміз бойынша осындай 119 дерек тіркелген.

Алаяқтардың құрбандарының бірі Талдықорған тұрғыны болды. Instagram желісін қарап отырып, әйел акцияларды сатып алу және сату арқылы аса жоғары пайда табуды ұсынатын жарнамаға тап болған. Сілтеме арқылы өткен жәбірленуші өзінің сауалнамалық және байланыс деректерін көрсетіп, өтінім қалдырған.

"Кейін жәбірленушімен қаскөйлер байланысқа шыққан. Олардың нұсқауларын орындаған ол үшінші тұлғалардың шоттарына 7 млн теңгеден астам ақша аударған. Бұл ретте ол аударған ақшалай қаражат және болжамды дивидендтер жалған әмиянда көрсетілген, алайда алаяқтар олардың қолма-қол ақшаға айналдыру мүмкіндігін бермеген. Аталған дерек бойынша сотқа дейінгі тергеп-тексеру жүргізіліп жатыр", - деп хабарлады Бас прокуратура.

Алаяқтардың құрбаны болмау үшін қазақстандықтарды қырағылық танытуға, кепілдендірілген жоғары табыс туралы ұсыныстарға сенбеуге және инвестиция деген желеумен бейтаныс адамдарға ақша аудармауға шақырады. Қаржы салмас бұрын компания мен ұсынылып отырған инвестициялық жоба туралы ақпаратты өз бетінше тексеру қажет. Күмәнді хабарламалар немесе қоңыраулар түскен жағдайда бейтаныс адамдармен сөйлесуді тоқтатып, оларға банк карталарының деректерін, SMS арқылы келген кодтарды және ақшаңызға қол жеткізуге мүмкіндік беретін өзге де мәліметтерді хабарламаған жөн.

Бұған дейін Қаржылық мониторинг агенттігі алаяқтар қазақстандықтарға ҚМА атынан жалған ресми хаттарды пайдалану жағдайлары жалғасып жатқаны туралы ескерткен болатын.

Тағы оқыңыз: “Неке мерзімі аяқталды“: қазақстандықтарға жаңа қауіп туралы ескертілді

Бізді Google-дың негізгі дереккөздер тізіміне қосыңыз