Қазақстандық колонияда отырып, бейнебайланыс арқылы ақша бопсалаған

Колонияда жазасын өтеп жатқан сотталушы Петропавлдың екі тұрғынынан ақша бопсалауға қатысқан. Жаңа қылмысы үшін оған қосымша мерзім тағайындалды, деп хабарлайды Tengrinews.kz Қылмыстық істер жөніндегі кассациялық сотқа сілтеме жасап.

Іс материалдарына сәйкес, бірнеше ер адам Петропавлдағы сауналардың бірінде екі адамды күштеп ұстап, күш қолданумен қорқытып, ақша талап еткен. Бұл уақытта олардың колонияда жазасын өтеп жатқан сыбайласы бейнебайланыс арқылы қосылып, жәбірленушілерге қысым көрсеткен.

Нәтижесінде жәбірленушілер 300 мың және 145 мың теңге көлемінде несие рәсімдеген. Іс материалдарына сәйкес, бұл ақша бопсалау жолымен алынған.

Сотталушының қылмысқа қатысы барын жәбірленушілердің түсініктемелері, сыбайластарының бірімен қылмыс егжей-тегжейін талқылаған хат алмасулары, мобильді оператордың деректері және банктік операциялар дәлелдеді.

Бірінші сатыдағы сот бопсалау фактісі бойынша ер адамды 3 жылға бас бостандығынан айырды. Алайда, түпкілікті жаза 8 жыл болып белгіленді. Өйткені ол жаңа қылмысты 2011 жылғы үкіммен тағайындалған 21 жыл 9 айлық жазасын өтеп жүрген кезде жасаған.

Кассациялық сот сотталушының кінәсі дәлелденгенін мойындап, жергілікті соттардың шешімін өзгеріссіз қалдырды.

Оның сыбайластарының қандай мерзімге сотталғаны туралы ақпарат берілмеді.

Бізді Google-дың негізгі дереккөздер тізіміне қосыңыз