Қазақстандық күтпеген жерден біреудің eGov аккаунтына кіріп кетті тексеріс басталды

Қазақстан тұрғыны eGov-тағы жеке кабинетіне кірмек болғанда, өзгенің аккаунтына кіріп кеткен. "Ұлттық ақпараттық технологиялар" АҚ (ҰАТ) жағдайға қатысты түсініктеме берді, деп хабарлайды Tengrinews.kz.

Мән-жайы

Қазақстан тұрғыны Threads әлеуметтік желісінде жазба жариялап, онда өз кабинетіне кірмек болған кезде кездейсоқ біреудің eGov аккаунтына кіріп кеткенін айтқан.

"eGov-қа өз аккаунтыма кірмек болғанымда, біреудің бөтен аккаунтына кіріп кеттім. Бұл қалайша мүмкін?", - делінген жазбада.

Жазбаға қалдырылған пікірлерде автор ноутбугінен одан басқа ешкім электронды үкімет веб-порталын пайдаланбағанын нақтылады. Оның айтуынша, бұл басқа пайдаланушының деректері браузерде сақталып қалу ықтималдығын жоққа шығарады.

"Тексеру жүріп жатыр": ҰАТ жауабы

"Ұлттық ақпараттық технологиялар" АҚ компания мамандары барлық мән-жайды, соның ішінде пайдаланушы сипаттаған авторизация сценарийін егжей-тегжейлі техникалық тексеруден өткізіп жатқанын хабарлады.

"Жағдайды жан-жақты қарастыру үшін жазба авторынан қосымша материалдар да сұратылды", - деп атап өтті компания өкілдері.

ҰАТ тексеру аяқталғаннан кейін толығырақ жауап беруге уәде берді.

eGov аккаунтын қалай қорғауға болады?

Сондай-ақ ҰАТ қазақстандықтарға eGov аккаунтын қорғау шараларын еске салды. Пайдаланушыларға мынадай кеңестер беріледі:

әр сервис үшін бірегей әрі күрделі құпия сөз қолдану; құпия сөзге туған күні, ЖСН немесе телефон нөмірі сияқты жеке деректерді қоспау; eGov, ЭЦҚ, банктік қосымшалар және басқа да сервистер үшін бірдей құпия сөзді пайдаланбау; құпия сөздерді қауіпсіз сақтау және жасау үшін пароль менеджерлерін қолдану; мүмкіндік бар жерде екі факторлы аутентификацияны қосу; ЭЦҚ кілттері мен құпия сөздерді үшінші тұлғаларға бермеу; ЭЦҚ кілттерін тек қауіпсіз жерде сақтау; жаңа ЭЦҚ кілттерін алғаннан кейін жаңа сенімді құпия сөз орнату.

Сондай-ақ компания азаматтарды сақ болуға және жеке деректерін бөгде адамдарға бермеуге шақырды.

Тағы оқыңыз: Атақты адамдардың видеоларына сенбеңіз: қазақстандықтарға жаңа схема туралы ескертілді

Google News арқылы жаңалықтарымызды қадағалаңыз

Жазылу