Қазақстандық мұғалімдер Кореяда сабақ береді

Қазақстан мен Оңтүстік Кореялық мамандар білім саласындағы ынтымақтастықты кеңейту жолдарын талқылады.

Кездесу Сихын қаласында өткен педагогтар форумында ұйымдастырылды. Жиынға Орталық Азия елдері мен Кёнги провинциясының ұстаздары қатысты. Бұл өңір Оңтүстік Кореяда шетелдік оқушылар саны бойынша алдыңғы қатарда тұр. Қазір мұндағы білім беру мекемелерінде қазақстандық мұғалімдер де жұмыс істейді. 

Сихын қаласында өткен форумда Қазақстан мен Кёнги провинциясы арасындағы ынтымақтастық қорытындыланды. Бұл әріптестік 2024 жылдың сәуір айында басталған. Қазақстанның Ғылым және жоғары білім министрлігі мен осы өңірдің білім басқармасы меморандумға қол қойған. Ал тамыз айында мұнда төрт жас маман келді. Олар түрлі ұлт өкілдерінің балалары оқитын үш мектепте сабақ берді. Нәтижесінде шетелдік оқушылардың үлгерімі артып, өңір билігі Қазақстаннан келетін мұғалімдер санын көбейту туралы шешім қабылдады.

Салтанат Дарғожиева, ҚР Ғылым және жоғары білім министрлігі басқармасының басшысы:

- Бірнеше іріктеу өтіп биыл корей мектептерінде еліміздің жоғары оқу орындарын тәмамдаған шамамен 8 түлек еңбек ететін болады. Яғни бұл жобалар Қазақстанды өңірлік білім беру хабына айналдыруға бағытталған негізгі мақсаттарға қол жеткізуге мүмкіндік береді.

Кёнги провинциясының билігі шетелден мұғалімдер шақыруға мәжбүр. Себебі аймақта шетелдік оқушылар саны едәуір артқан. Егер 13 жыл бұрын олардың саны 47 мың болса, биыл бұл көрсеткіш 5 есеге өсті. Білім іздеп келгендердің көбі Вьетнам, Қытай және Филиппин азаматтары. Одан кейінгі орында Орталық Азия елдері. Қазір бұл аймақтан барып оқып жатқан балалардың саны 9 мыңнан асады.

Хон Джон Пё, Кёнги провинциясы Білім басқармасы басшысының орынбасары:

- Елімізде сапасы жағынан алдыңғы орындардың бірін иеленетін Кёнгидо провинциясының мектептерінде бүгінде түрлі тіл мен мәдениет өкілдері көп. Мұндай ортада білім беру – барлық қатысушыларға тиімді әрі мол тәжірибе жинақтауға көмектеседі деп сенеміз.

Кёнги провинциясында шетелдік оқушылардың көбі корей тілін жетік білмейді. Сондықтан қазақстандық ұстаздар олармен қосымша дайындық сабақтарын өткізеді. Солардың бірі – Жәния Қожахметова. Әл-Фараби атындағы Қазақ ұлттық университетінің магистранты қазір Ансан қаласындағы бастауыш мектепте мұғалімнің көмекшісі болып жұмыс істейді.

Жәния Қожахметова, Ансан қаласы бастауыш мектебі мұғалімінің көмекшісі:

- Балалардың шамамен 70 пайызы шетелдік оқушылар. Орыс тілді балалардан бөлек қытай, вьетнам және тағы басқа ұлт өкілдері көп. Сондықтан олардың басым бөлігі корей тілін білмей келеді. Ал тіл білмесең жергілікті ортаға бейімделу қиын. 

Өткен жылдың сәуір айында Қазақстанның Ғылым және жоғары білім министрлігі мен Кёнги провинциясының білім басқармасы арасында тағы бір меморандумға қол қойылды. Тараптар жоғары сынып оқушыларына арналған тағылымдамалар ұйымдастыруға келісті. Нәтижесінде былтыр жазда Кореядан келген бір топ оқушы Гумилёв атындағы Еуразия ұлттық университетінде, ал қазақстандық оқушылар осы елдегі жоғары оқу орындарында білімдерін жетілдірді.

Авторлары: Владислав Цой, Ольга Лян