Қазақстандықтар үшін Индонезияға кірудің жаңа ережелері не белгілі

Қазақстан азаматтары Индонезияға визасыз кіріп, елде 30 күнге дейін бола алады. Алайда ол үшін келген бойда арнайы құжат толтыру қажет. Бұл туралы Қазақстан СІМ ресми өкілі Жанболат Үсенов айтты, деп хабарлайды Tengri Travel.

Индонезияға кіру талаптары

Жанболат Үсеновтің айтуынша, шілдеден бастап Қазақстан мен Индонезия паспорттарының иелері үшін 30 күнге дейінгі мерзімге визасыз режим қолданылады.

Визасыз режим тегін және елге бір рет кіруге мүмкіндік береді.

"Елде болудың ең ұзақ мерзімі - келген күннен бастап 30 күн. Бұл ретте азаматтар Индонезияға кіру кезіндегі жалпы талаптарды да ескеруі тиіс", – деді Үсенов.

Атап айтқанда, Индонезияға шетелден келетін барлық жолаушы бірыңғай электрон декларация толтыруы қажет. Декларация тегін және оны алдын ала рәсімдеуге болады.

Қазақстан СІМ сапар алдында қолданыстағы кіру талаптарымен алдын ала танысып, Индонезияның көші-қон ережелерін сақтауды ұсынады.

2026 жылғы маусымда Индонезия билігі Қазақстан мен тағы бірнеше елдің азаматтарына визасыз режим енгізу мүмкіндігін қарастырып жатқаны хабарланған болатын. Елдің туризм министрлігінің мәліметінше, бұл шара саяхатшыларды көбірек тартып, туристік сектор шығындарын өтеуге көмектесуі тиіс.

Тағы оқыңыз: Қазақстандықтарға рұқсатсыз жұмыс істегені үшін Грузияға кіруге тыйым салынуы мүмкін

Бізді Google-дың негізгі дереккөздер тізіміне қосыңыз