Қазақстандықтар Индонезияға визасыз режим ала алады не белгілі

Индонезия визасыз режим енгізілетін елдер тізімін кеңейтіп, оған Қазақстанды қосуды жоспарлап отыр. Бастама ведомствоаралық деңгейде мақұлданды, қазір ол бекітудің соңғы кезеңінде тұр, деп хабарлайды Tengri Travel.

Индонезия визасыз режим енгізілетін елдер тізімін кеңейтіп, оған Қазақстанды қосуды жоспарлап отыр. Бастама ведомствоаралық деңгейде мақұлданды, қазір ол бекітудің соңғы кезеңінде тұр, деп хабарлайды Tengri Travel.

Kabar Bisnis ақпаратынша, Индонезия билігі Қазақстан мен тағы бірнеше елдің азаматы үшін визасыз режим енгізу мүмкіндігін қарастырып жатыр. Елдің Туризм министрлігінің мәліметінше, бұл шара саяхатшыларды көбірек тартып, туризм секторындағы шығындардың орнын толтыруға көмектесуі тиіс.

Жаңа тізімге мына елдер енуі мүмкін:

Қазақстан; Беларусь; Жапония; Оңтүстік Корея; Аустралия; Жаңа Зеландия; Үндістан; Макао; Сингапурдың тұрақты резиденттері. Индонезия неліктен визасыз режимді кеңейтуге шешім қабылдады?

Индонезия Туризм министрлігі 2026 жылы 17,6 миллион шетелдік туристі қабылдауды жоспарлап отыр. Алайда Таяу Шығыстағы әуе қатынасына қатысты мәселелер бұл жоспарға кедергі келтірген.

Туризм министрі Видиянти Путри Вардхананың айтуынша, 27 мамырдағы жағдай бойынша 1 444 рейс тоқтатылған.

"Қалыптасқан жағдайға байланысты Индонезия шетелдік туристердің 160 052 сапарынан айырылып қалу қаупі бар, олар іске аспай қалуы мүмкін", - деді Видиянти.

Алыс бағыттардағы (Еуропа және Таяу Шығыс) шығындарды өтеу үшін ведомство маркетингті жедел түрде Азия-Тынық мұхиты аймағының жақын нарықтарына қайта бағыттап жатыр.

Тағы қандай жоспарлар бар?

Жергілікті БАҚ мәліметтері бойынша, визасыз режимді кеңейтуден бөлек, Индонезия үкіметі мынадай шараларды қолға алмақ:

әуекомпанияларға субсидиялар арқылы қолдау көрсету; рейстердегі жолаушылар орындарының санын көбейту; Азия нарықтарында елді таныту жұмыстарын күшейту.

Туризм министрінің айтуынша, барлық ведомствоаралық келісім аяқталды, ал жобаның өзі бекітудің қорытынды кезеңінде.

Жаңа ережелер қашан күшіне енеді?

Қазақстандықтар үшін визасыз режимнің нақты іске қосылу күні әлі белгісіз. Индонезия билігі жаңа кіру ережелерін енгізу туралы ресми шешімді әлі жариялаған жоқ.

Егер бастама мақұлданса, Қазақстан азаматтары Индонезияға жаңа тізімдегі басқа елдердің тұрғындары сияқты талаптармен визасыз бара алады.

Тағы оқыңыз: Өтінімдердің жартысына жуығы қабылданбайды: АҚШ визасын алу неге қиындады?

Google News арқылы жаңалықтарымызды қадағалаңыз

Жазылу