Қазақстандықтар зейнетақы шегін көтеруге қарсы шықты

Қазақстанда зейнетақы жинақтарының ең төменгі жеткіліктілік шегін арттыру туралы ұсыныс қоғамда қызу талқыланып, азаматтардың қарсылығына тап болды.

6 сәуірде Еңбек және халықты әлеуметтік қорғау министрлігі Ашық НҚА порталында тиісті қаулы жобасын жариялаған. Құжатқа сәйкес, болашақта зейнетақы төлемдерінің тұрақтылығын қамтамасыз ету үшін азаматтардың шотында қалуы тиіс ең төменгі сома қайта есептелмек.

Министрлік бұл өзгерістер зейнетақы жүйесін теңгерімді етуге бағытталғанын атап өтеді. Есептеу кезінде өмір сүру ұзақтығы мен инвестициялық табыстылық сияқты экономикалық факторлар ескерілмек. Ведомство басшысы Асқарбек Ертаев жеткіліктілік шегін көтеру жоспары бар екенін растаған.

Алайда бастама қоғам тарапынан қолдау таппады. Ашық талқылау барысында құжатты шамамен 4,5 мың адам қарағанымен, бірде-бір оң дауыс тіркелмеген. Көпшілік есептеу әдістемесінің түсініксіз екенін айтып, процестің ашықтығына күмән келтірген. Кейбір азаматтар қоғамдық талқылау формалды сипатта өтуде деген пікір білдірген.

Өз кезегінде министрлік реформаның басты мақсаты – азаматтарды болашақта тұрақты зейнетақымен қамтамасыз ету екенін алға тартады. Сонымен қатар, қолданыстағы тәртіп бойынша тұрғындардың зейнетақы жинақтарының бір бөлігін тұрғын үй жағдайын жақсартуға немесе емделуге пайдалану мүмкіндігі сақталатыны атап өтілді.

Мәселе бойынша қоғамдық талқылау жалғасып жатыр.