Қазақстандықтарды шошытқан жолбарыс фотосы фейк деп аталды

Қазақстанның Экология және табиғи ресурстар министрлігі әлеуметтік желілерде Балқаш маңында жабайы табиғатқа жіберілген амур жолбарысы көзге түсті деген ақпаратқа қатысты пікір білдірді, - деп хабарлайды Tengri Travel.

Бәрі қалай басталды?

Ведомство жарияланған суреттің шындыққа жанаспайтынын және оның жасанды интеллект көмегімен жасалған болуы мүмкін екенін мәлімдеді.

Фото: threads.com/@eakrg

Айта кетейік, әлеуметтік желілерде "жолбарыс жүр техснаб жақта" деген жазба пайда болды. Онда жануардың суреті көрсетілген.

Экология министрлігі суреттің шынайы жағдайға еш қатысы жоқ екенін атап өтті.

"Әлеуметтік желілерде "Іле-Балқаш" мемлекеттік табиғи резерваты аумағында табиғатқа жіберілген жолбарыс түсірілді деген ақпарат пен сурет тарап жатыр. Бұл ақпарат шындыққа сәйкес келмейді", - деп мәлімдеді министрліктің баспасөз қызметі.

Ведомство мәліметінше, жарияланған суретте оның жасанды интеллект арқылы жасалғанын көрсететін белгілер бар.

"Жарияланған суретте жасанды интеллект (AI) арқылы жасалған болуы мүмкін белгілер байқалады", - деп хабарлады министрліктегілер.

Фото: Экология және табиғи ресурстар министрлігінің баспасөз қызметі

Министрлік жабайы табиғатқа жіберілген жолбарысқа заманауи спутниктік GPS-қарғыбау тағылғанын, соның арқасында мамандар жануардың қайда жүргенін үнемі біліп отыратынын еске салды.

"Табиғатқа жіберілген жолбарыс аналығы спутниктік GPS-ошақпен жабдықталған. "Іле-Балқаш" мемлекеттік табиғи резерватының мамандары оның орналасқан жері мен жағдайын тәулік бойы үздіксіз бақылауда ұстайды. Сондықтан жануардың "кездейсоқ түсірілгені" туралы ақпарат шындыққа жанаспайды", - деді ведомство өкілдері.

Спутниктік қарғыбаудан бөлек, жануарды бақылау үшін фототұзақтар мен басқа да мониторинг құралдары қолданылады. Мамандар жолбарыстың қозғалысын, жаңа аумақты қалай игеріп, табиғи ортадағы өмірге қалай бейімделіп жатқанын бақылауда ұстап отыр.

Экология министрлігі әлеуметтік желі пайдаланушылары мен БАҚ өкілдерін тексерілмеген ақпаратты таратпауға шақырды.

"Азаматтар мен БАҚ өкілдерін тексерілмеген ақпаратты таратпауға және тек ресми ақпарат көздеріне ғана сенуге шақырамыз", - делінген ведомство хабарламасында.

Сондай-ақ, министрлік көрінеу жалған ақпарат пен сенімсіз фото және видеоматериалдарды жариялау Қазақстан заңнамасында қарастырылған жауапкершілікке әкеп соқтыруы мүмкін екенін ескертті.

Еске салайық, Амур жолбарысының Үміт атты аналығы "Іле-Балқаш" мемлекеттік табиғи резерватына жіберілді. Бұл Қазақстан аумағында жолбарыс жойылып кеткеніне 70 жылдан аса уақыт өткен соң алғаш рет іске асырылып отыр және популяциясын қалпына келтіру бағдарламасының алғашқы кезеңі болды.

"Іле-Балқаш" мемлекеттік табиғи резерватының аумағы кездейсоқ таңдалған жоқ. Оңтүстік Балқаш өңірі мен Іле өзенінің бойы тарихи тұрғыдан жолбарыстың табиғи мекені болған. Бұл аумақта Орталық Азиядағы ең ірі жыртқыштардың бірі - Тұран жолбарысы мекендеген. Бірегей тоғайлы ормандар мен мол қоректік база оның тіршілік етуіне қолайлы жағдай қалыптастырған.

Алайда ХХ ғасырдың ортасында тоғайлы ормандар алқабының қысқаруы, жабайы тұяқты жануарлар санының азаюы және браконьерлік салдарынан жолбарыс Қазақстан аумағынан толықтай жойылды. Жолбарыстың соңғы рет кездескені туралы нақты деректер осыдан 70 жылдан астам уақыт бұрын тіркелген.

Google News арқылы жаңалықтарымызды қадағалаңыз