Қазақстанға екі жаңа авиакомпания ұшатын болады

Қазақстанға жаңа екі шетелдік чартерлік әуекомпания - вьетнамдық Sun PhuQuoc Airways пен Siam Wings Airlines келмек, - деп хабарлайды Tengri Travel.

Sun PhuQuoc Airways туралы не белгілі?

Қазақстанға рейс орындау жоспары туралы вьетнамдық Sun PhuQuoc Airways (SPA) мәлімдеді. Әуекомпания VN-A925 тіркеу нөмірі бар өзінің алғашқы Airbus A321neo LR ұшағын таныстырды.

Тасымалдаушы мәліметінше, A321neo LR нұсқасы екі қосымша жанармай багымен жабдықталған және 4 мың теңіз миліне (шамамен 7,4 мың шақырым) дейінгі қашықтықты бағындыра алады. Компания мәліметінше, бұл ұшақты ұзақ бағыттар үшін пайдалануға мүмкіндік береді.

"Сонымен қатар SPA-ның алғашқы A321neo LR ұшағы Вьетнамда пайдалануға берілген алғашқы A321neo LR", - делінген әуекомпания хабарламасында.

Sun PhuQuoc Airways мәліметінше, ұшақ Жапонияға, Қазақстанға және Орталық Азия елдеріне бағыттар ашу үшін қолданылуы тиіс. Компания жаңа ұшақты өзінің маршруттық желісін кеңейтудің бір бөлігі деп атайды.

Бұл ретте Вьетнам мен Қазақстан арасындағы нақты бағыт, межелі әуежай, рейстер жиілігі мен ұшудың басталу күні көрсетілмеген.

Instagram-дағы бұл жарияланымды көру

Sun PhuQuoc Airways (@sunphuquocairways) жариялаған жазба

Sun PhuQuoc Airways - Sun Group құрған жас вьетнамдық әуекомпания. Тасымалдаушының негізгі базасы - Фукуок аралы. Ол жерден компания тек Вьетнам ішінде ғана емес, сонымен қатар шетелге де ұшуды жоспарлап отыр. Жоспарда - Жапония, Оңтүстік Корея, Қытай және басқа да Азия елдеріне рейстер бар.

SiamWings Airlines туралы не белгілі?

Қазақстанда тағы бір шетелдік әуекомпания жұмысын бастауы мүмкін. SiamWings Airlines әлеуметтік желіде Алматымен сәлемдескен фото жариялады.

"Қош келдің, Алматы! Қазақстаннан ыстық сәлем!" - делінген жазбаның сипаттамасында.

Instagram-дағы бұл жарияланымды көру

SiamWings Airlines (@siamwingsairlines) жариялаған жазба

Жарияланған ақпаратта алдағы рейстер туралы басқа мәлімет жоқ. Атап айтқанда, SiamWings Airlines Алматыға қай қаладан рейс орындайтыны, бағдарламаның қашан басталатыны және қанша рейс жоспарланғаны әзірге хабарланған жоқ.

SiamWings Airlines - Бангкок, Пхукет және Таиландтың басқа да қалаларына ұшатын таиландтық әуекомпания. Компания сайтында жұмыстың негізгі қағидаттары ретінде қауіпсіздік пен сенімділік, сервис, ұқыптылық және жолаушыларға жеке көзқарас көрсетілген.

Бұған дейін Азаматтық авиация комитеті 2026 жылдың аяғына дейін бірнеше халықаралық бағыт бойынша жаңа рейстердің ашылуы күтілетінін хабарлаған болатын. Жоспардағы бағыттар:

Алматы - Үргеніш; Ақтөбе - Баку; Алматы - Чунцин; Орал - Мәскеу; Павлодар - Новосибирск; Ханой - Алматы - Прага; Астана - Инин.

Тағы оқыңыз: Астанадан Нью-Йорк, Лондон және Парижге: премьер-министр жаңа әуе рейстерін ашуды тапсырды

Бізді Google-дың негізгі дереккөздер тізіміне қосыңыз

Қосу