Қазақстанға Ресейден жолбарыстар сәуір мамыр айларында жеткізіледі

АСТАНА, 11 наурыз – Sputnik. Ресейден жолбарыстар 2026 жылдың сәуір-мамыр айларында Қазақстанға жеткізіледі, деп мәлімдеді экология және табиғи ресурстар министрі Ерлан Нысанбаев.

Оның айтуынша, Тұран жолбарыстарының популяциясын қалпына келтіру бағдарламасын жалғастыру үшін елге тағы төрт жолбарыс әкелу жоспарланып отыр.

2024 жылы Нидерландыдан Қазақстанға Амур жолбарыстарының жұбы жеткізіліп, олар Іле-Балқаш табиғи қорығына орналастырылды.

Нысанбаев жолбарыстар қоршауда жақсы өмір сүріп жатқанын, бірақ әлі төлдемегенін айтты.

"Өткен жылы 23 желтоқсанда жұптасу болды, бірақ ұрықтану болған жоқ. Бірақ жақында ғана, жылдың басында бұл процесс қайтадан тіркелді және біз бұл жұптан ұрпақ аламыз деп үміттенеміз. Сонымен қатар біз Ресей тарапымен келісімге сәйкес сәуір-мамыр айларында төрт жолбарыс әкелуді жоспарлап отырмыз", - деді ол.

Оның айтуынша, алты жолбарыс қайта жерсіндіру бағдарламасының бөлігі ретінде Тұран жолбарыстарының популяциясын қалпына келтіруді бастау үшін пайдаланылады.