Қазақстаннан жаңа бағыттар: 2026 жылдың соңына дейін қандай рейстер ашылады

2026 жылдың соңына дейін Қазақстанда бірнеше жаңа халықаралық рейс ашу жоспарланып отыр. Қазақстандықтар қай бағыттарға ұша алатыны туралы Tengri Travel материалында.

2026 жылдың соңына дейін қандай рейстер ашылады?

Азаматтық авиация комитеті редакцияның сауалына берген жауабында 2026 жылдың соңына дейін мына бағыттар бойынша жаңа рейстердің ашылуы күтілетінін хабарлады:

Алматы – Үргеніш (Өзбекстан); Ақтөбе – Баку (Әзербайжан); Алматы – Чунцин (Қытай); Орал – Мәскеу (Ресей); Павлодар – Новосибирск (Ресей); Ханой (Вьетнам) – Алматы – Прага (Чехия); Астана – Инин (Қытай). Токио: рейс бірнеше жылдан бері уәде етіліп келеді

ААК қазіргі уақытта Токиомен тікелей әуе қатынасын ашу бойынша жұмыстар жалғасып жатқанын хабарлады. Рейсті 2026 жылдың соңына дейін ашу жоспарда бар, бірақ комитет нақты мерзімін атаған жоқ.

Бұл бағыт бірнеше жылдан бері талқыланып келеді, ал мерзімдері бірнеше рет өзгерді. Сәуір айында Көлік министрлігі кідірісті Boeing Dreamliner ұшақтарының жеткізілуімен түсіндірген. Мамыр айында көлік министрі Нұрлан Сауранбаев рейстің 2026 жылдың төртінші тоқсанында іске қосылатынын мәлімдеген болатын.

Сол кезде премьер-министр Олжас Бектенов Токио мен Нью-Йоркке рейстердің көптен бері уәде етіліп келе жатқанын еске салды.

"Бұл тағы да бос сөз болып қалмауы тиіс", – деп атап өтті ол.

Нью-Йорк: жоспарда бар

ААК Нью-Йоркке рейс ашу мәселесі де жоспарда қалып отырғанын жеткізді. Оны іске қосу үшін Қазақстан АҚШ-тың уәкілетті органдарынан рұқсат алып, жаңа ұшақтардың жеткізілуін күтуі қажет.

"АҚШ-қа рейстер ашу мәселесін пысықтау аясында АҚШ-тың уәкілетті органдары тарапынан тиісті рұқсаттар алу қажет. Сондай-ақ әуе кемелерінің жеткізілуі күтіледі, жеткізу мерзімдері дайындаушы зауытқа байланысты", – деп түсіндірді комитеттегілер.

Нью-Йоркке тікелей рейс 2023 жылдан бері талқыланып келеді. Бастапқыда оны 2025 жылы іске қосу жоспарланған болатын, бірақ мерзімдері бірнеше рет кейінге шегерілді. 2026 жылдың мамыр айында Көлік министрлігінің басшысы жаңа межені – 2027 жылдың екінші тоқсанын атады.

Париж, Рим, Вена, Лондон және Гонконг та жоспарда

ААК-ның жаңа жауабында Париж, Рим, Вена, Лондон және Гонконг бағыттарына тікелей рейстер ашу мәселесі пысықталып жатқаны айтылған. Комитет бұл бағыттардың нақты ашылу күндерін атаған жоқ.

Бұл қалалар бұған дейін де жоспарда болған. Римге рейс ашу 2024 жылдан бері талқыланып жатыр, ал 2025 жылы Көлік министрлігі оны 2026 жылы ашуды жоспарлаған еді.

Биыл мамырда премьер-министр 2027 жылы Астанадан Париж, Рим, Вена және Лондон қалаларына тікелей рейстерді іске қосуды тапсырды.

Қандай жаңа бағыттар пайда болды?

ААК мәліметінше, 2026 жылы қазақстандық маршруттық желі жаңа және қайта жаңғыртылған рейстермен толықты. Олардың қатарында Ереван (Армения), Ларнака (Кипр), Гуанчжоу (Қытай), Ұлан-Батор (Моңғолия), Батуми (Грузия), Шанхай (Қытай), Баку (Әзербайжан), Варшава (Польша), Ташкент (Өзбекстан), Орынбор (Ресей) және Измир (Түркия) бағыттары бар.

Сонымен қатар биыл қазақстандық нарыққа төрт шетелдік әуекомпаниясы шықты: Өзбекстаннан Qanot Sharq, Армениядан Shirak Avia және FlyOne Armenia, Ресейден UVT Aero және Түркиядан SunExpress.

Сондай-ақ Қазақстанның 17 халықаралық әуежайында "ашық аспан" режимі жұмысын жалғастырып келеді. Ол рейстер санына қойылған шектеулерді алып тастап, шетелдік тасымалдаушыларға Қазақстан арқылы үшінші елдерге рейстер орындауға мүмкіндік береді.

Қазақстан мен Қытай арасында жаңа әуе рейстері іске қосылады

Google News арқылы жаңалықтарымызды қадағалаңыз

Жазылу