Қазақтың бұлбұлы Бибігүл Төлегенова 96 жасқа толды

Бүгін қазақтың бұлбұлы Бибігүл Төлегенова 96 жасқа толды. Әншінің туған күні 16 желтоқсан Тәуелсіздік күнімен тұспа-тұс келген.

Халық әртісі мұны үлкен бақыт санайды. «Мен үшін Тәуелсіздік күні ең қастерлі мереке. Мерекеде туған күнімді атап, қос бірдей қуанышқа кенелемін», - дейді.

Бибігүл  Төлегенова дегенде әншінің бойтұмарына айналған Латиф Хамидидің «Бұлбұлы» қоса аталады. Өйтетіндей жөні бар. Ол өзі сүйіп орындаған «Бұлбұл» әніндей қазақтың нағыз бұлбұлына айналды. Туған жерін  әнмен тербеді. Халқы да оның қайталанбас өнерін ерекше бағалап, мақтан тұтты. Күміс көмей, жезтаңдай әнші 70 жылға жуық сахнаның сәнін келтірді.  ЮНЕСКО ұйымы оны 20-ғасырдағы әйгілі әйелдердің қатарына қосқан. Биыл ән падишасы 96 жасқа толып отыр. Бибігүл Ахметқызы 1929 жылы 16 желтоқсан күні Семей қаласында дүниеге келген. Әлі күнге дейін 2-3 айда бір рет өзі оқыған консерваторияға барып, жас таланттарды тыңдап, бағыт-бағдар беріп қайтады.

Бибігүл Төлегенова, Қазақстанның Халық әртісі: 

- Жастарға білген-түйгенді айтып, тәлім-тәрбие беру үшін адам баласы өзінің мамандығын жақсы білуі керек. Мен микрофонмен ән айтатын әнші емеспін. Кәсіби әншімін. Далада, егіншілердің арасы, бұзау қорасы болсын, сиыр қорасын болсын, концерттік залдарымыз сол болды. Ол жерде микрофон да жоқ, ештеңе жоқ. Аккордионист, баянистпен бірге тұрып солар сүйемелдей білетін шығармаларды айтып, сол елдің алдына шығып елге өзімнің өнерімді көрстетінмін. 

Бибігүл Төлегенованың орындауындағы «Қараторғай», «Қызқарағай», «Інжу-маржан», «Қазақ вальсі», «Тақиялы періште» фильміндегі  «Мама» сияқты шығармалар қазақ өнерінің алтын қорында сақтаулы. Біртуар әншінің ән қоржынында әлемдік музыка жауһарлары, романстар мен ариялар көптеп енген. Ол кино өнерінде де өзіндік із қалдырды. Аты аңызға айналған әнші - КСРО және Қазақстанның Халық әртісі, КСРО Мемлекеттік сыйлығының лауреаты, Социалистік Еңбек ері. Ұлттық өнерге қосқан ерекше үлесі үшін мемлекеттік наградалармен марапатталған. Ғибратты ғұмыр иесінің өзі «халықтың алығысынан артық марапат жоқ», - дейді. 

Бибігүл Төлегенова,  Қазақстанның Халық әртісі:

- Халықтың көңілінен шықсаң, одан артық ештеңе жоқ. Қандай атағың болсын, лауазымың болсын, халық сені сүймесе, түсінбесе, барлығы бір тиын. 

«Адам әдемі өмір сүріп, әдемі қартаю керек. Жан-жағыңа жақсылық тілеп, тек ізгі ойлар ойлауға тырысқан жөн». Ғасырға жуық ғұмыр кешіп келе жатқан бұлбұл әншінің ұстанымы осындай.   

Авторлары: Қарлығаш Қайыпбекова, Валентин Лобанов