ҚазМұнайГаз мұнай өңдеу зауыттарында жасанды интеллект енгізуде

Мемлекет басшысы жариялаған Цифрландыру және жасанды интеллект жылы аясында «ҚазМұнайГаз» ұлттық компаниясы мұнай өңдеу және мұнай-химия кәсіпорындарында жабдықтардың істен шығуын алдын ала болжайтын сараптамалық жүйені кезең-кезеңімен енгізіп келеді.

Бүгінде зауыттардың сенімділігі басты технологиялық қондырғыларға орнатылған мыңдаған есептеуіш құралдардан келіп түсетін үздіксіз деректер ағынымен қамтамасыз етіледі. Жасанды интеллект осы деректерді талдау арқылы жабдықтағы ақауларды ерте анықтап, жоспардан тыс тоқтаулардың алдын алады.

Шымкент мұнай өңдеу зауыты үш жылдық жөндеуаралық циклге көшіп, күрделі жөндеусіз үздіксіз жұмыс істеуде. Сенімділікті арттыру үшін 2026 жылғы сәуірде кәсіпорында маңызды компрессорларға арналған предиктивті сараптаманың алғашқы кезеңі іске қосылды.

Атырау және Павлодар мұнай өңдеу зауыттарында да бұл жүйелерді енгізу жөндеуаралық кезеңдерді ұзартудың негізгі талабы болып отыр. 2025 жылы екі зауытта пилоттық жобалар іске қосылып, тиімділігі дәлелденді. Қазір Атырау зауытында баяу кокстеу қондырғысының реакторларына ақауларды ерте анықтау жүйесі жұмыс істеп тұр.

2026 жылы АМӨЗ және ПМХЗ жүйені қосымша агрегаттарға кеңінен енгізіп, ауқымды шараларды қолға алды. Әр зауытта үш кезең ішінде 100-ден астам жабдықты қамту жоспарланған.

Алғашқы кезең KPI полипропилен зауытында жүзеге асырылып, аса маңызды он технологиялық торап жүйеге қосылды.

ҚазМұнайГаз ұлттық компания ретінде барлық бағытта цифрлық жобаларды іске асыруды жалғастырып, өндірістің сенімділігін арттыру мен шығындарды азайтуға басымдық беріп отыр.

Бүгін, 14:07