Мұнай өңдеу зауытындағы жаңашылдық

Qazaq24.com, Egemen.KZ дереккөзінен алынған ақпаратқа сүйене отырып жаңалық таратты..

Еліміздегі байырғы кәсіпорын – Атырау мұнай өңдеу зауытында жабдықтардың жұмысын бақылауға жасанды интеллект енгізілді. Бұл – цифрлық трансформация аясындағы қанатқақты жоба.

Зауыттың бас директоры Қуаныш Бишімовтің айтуынша, мұндай жобаны іске асыру үшін осы салада мол тәжірибесі бар серіктес қажет. Өйткені жасанды интеллектімен мұнай өңдеу зауытындағы түрлі жабдықтың істен шығуына предиктивті талдау жүйесі қолданылады. Міне, осындай себеппен аталған жобаны енгізуге АҚШ-тың өнеркәсіптік автоматтандыру және технологиялық үдерістерді басқару саласында озық тәжірибе жинақтаған «Honeywell» корпорациясы серіктес ретінде тартылыпты.

«Мұнай өңдеу технологиясы күрделілігімен ерекшеленеді. Осы орайда предиктивті талдау жабдықтарда жұмыс параметрлері негізінде ықтимал ақаулардың бастапқы белгілерін анықтайды. Жабдықтардың техникалық жай-күйін болжауға мүмкіндік береді. Жасанды интеллект жүйесі ауқымды деректерді талдайды. Технологиялық ауытқуларды анықтап, жабдықтардың нақты жағдайына сәйкес техникалық қызмет көрсету мүмкіндігін қамтамасыз етеді. Техникалық персоналға арнайы ұсыныстар дайындайды», дейді Қ.Бишімов.

Оның дерегіне қарағанда, мұнай өңдеу зауытында предиктивті талдауды енгізу бірнеше үдерісті біріктіретін бірыңғай мониторинг жүйесін құруға бағытталып отыр. Біріншіден, деректерді жинауға басымдық беріледі. Екіншіден, жабдықтардың техникалық күйіне талдау жасалады. Үшіншіден, басқарушылық шешімдерді қолдауға бағыт ұсталады.

«Бұл оқыс жайттар мен апаттық жағдайда тоқтату тәуекелін төмендетеді. Жабдықтардың сенімділігін арттырып, қызмет көрсету мерзімін ұзартады. Мұндай тиімділік өндірістік активтерді тиімді басқаруға мүмкіндік береді», дейді бас директор.

Қазір мұнай өңдеу зауытында дамыған цифрлық экожүйе қалыптасқан. Бұл жүйеде өндірістік, энергетикалық және зертханалық үдерістерді басқару, оның ішінде Honeywell PHD деректерді сақтау платформасы, MES санатындағы шешімдер мен жабдықтарды мониторингілеу бағыты бар.

«Цифрландырудың жаңа кезеңі зауыттың аса маңызды технологиялық қондырғыларын қамтыды. Атап айтқанда, қазан айында «Honeywell» корпорациясымен бірлесе іске қосылған пилоттық жоба каталитикалық крекинг қондырғысының компрессоры мен үздіксіз каталитикалық риформинг қондырғысы бар CCR кешенінің негізгі жабдықтарына енгізілді. Зауыт өндірісіндегі жаңа технологияның тиімділігі дәлелденіп отыр. Бұл жүйе компрессордағы жасырын аномалияны анықтап, ақау жоспарлы алдын алу жұмыстары кезінде жойылды», деп мәлімдеді Қ.Бишімов.

Сондай-ақ зауыт «Динамика» ғылыми-өндірістік орталығымен ынтымақтастықты нығайтып отыр. Бұл – дірілді диагностикалау, компьютерлік мониторинг, өнеркәсіптік жабдықтардың техникалық жай-күйін кешенді бағалау технологиялары мен жүйелерін әзірлеуге, енгізуге маманданған ресейлік компания.

«Былтыр аталған компанияның дірілді диагностикалау жүйесі зауыттағы 819 техниканы қамтыды. Ал (каталитикалық крекингтің бензинін гидротазарту кешеніндегі Prime G қондырғысының функционалын кеңейту аясында жүйеге қосымша қысым, температура және деңгей параметрлері енгізілді. Жасанды интеллект модельдері мұнда да жоғары нәтиже көрсетті. Жүйе сорғылардың кірісіндегі қысымның төмендеуін автоматты түрде анықтап, нәтижесінде жабдықтың жұмысы дереу тұрақтандырылды», дейді кәсіпорын басшысы.

«ҚазМұнайГаз» компаниясы бұл жобаларды операциялық тиімділікті арттыруға бағытталған ұзақмерзімді стратегияның негізі ретінде қарастырып отыр. Ал Атырау мұнай зауыты үшін предиктивті талдауды енгізудің үш жылдық бағдарламасы әзірленді. Мәселен, алдағы мониторинг жүйесі енгізілетін аса маңызды 28 бірлік жабдықтың тізімі жасақталды. Қазір компания сарапшылары өзге де жетекші вендорлардың техникалық шешімдерін жан-жақты зерделеуді қолға алды.

Атырау облысы

Соңғы жаңалықтар