Атыраудағы маңдайшалардың жаңа ережелері: 15 кәсіпкерге ескерту жасалды

Атырауда кәсіпкерлерге жарнамалық маңдайшаларды орналастыру кезіндегі заңбұзушылықтар туралы ескерту жасала бастады. 1 қазаннан бастап өңірде бизнес нысандарын безендіруге қойылатын жаңа талаптар күшіне енді.

Ведомствоның мәліметінше, маңдайшалары мен жарнамалық баннерлері жаңа ережелерге сәйкес келмейтін 15 жергілікті кәсіпкер ескерту алып үлгерген.

Енді маңдайшаны орнатпас бұрын нысан иелері оның эскизін жергілікті әкімдікпен келісуге міндетті. Құжатта мыналарды анық көрсету қажет: 

нысанның орналасу жоспары;

маңдайшаның күндізгі және түнгі уақыттағы сыртқы көрінісі;

конструктивтік және инженерлік шешімдер;

қолданылатын материалдар мен түсі туралы мәліметтер.

Маңдайшаны орналастыру туралы хабарлама жоспарланған күнге дейін кемінде 5 жұмыс күні бұрын жіберіледі. Құжаттарды қарау мерзімі - 4 жұмыс күні.

Егер ұсынылған эскиз белгіленген талаптарға сәйкес келмесе, әкімдік кәсіпкерге жазбаша түрде ескерту жібереді. Мұндай жағдайда маңдайшаны орнатуға барлық кемшіліктер жойылғаннан кейін ғана рұқсат етіледі.

Кеше, 10:48