Жүргізуші грузиялық нөмірлерді қазақстандық нөмірлердің астына жасырып, Қарағанды облысында қамауға алынды

Қарағанды облысында патрульдік полицейлер өзге біреудің нөмірін тағып, көліктің нақты тіркеу деректерін жасырмақ болған DAF жүк көлігінің 35 жастағы жүргізушісін ұстады, деп хабарлайды Tengri Auto тілшісі Polisia.kz-ке сілтеме жасап.

Оқиға 7 қазанда Астана – Қарағанды тасжолында болған. Патрульдік полиция экипажы QAJ жүйесінен бағдар алды: елордадан Қарағандыға қарай бет алған жүк көлігінде жалған мемлекеттік тіркеу нөмірлері пайдаланылуы мүмкін деген ақпарат түскен.

Көлік жолдың 111-шақырымында, Осакаровка кенті маңында тоқтатылды. Тексеріс барысында полицейлердің күдігі расталды: қазақстандық мемлекеттік нөмірдің астына басқа мемлекеттің – Грузияның тіркеу белгілері орнатылған болып шықты.

Жүк көлігі арнайы айыптұраққа қойылды. Жүргізушіге қатысты ҚР ӘҚБтК-нің 590-бабы 3 және 4-бөлімдері бойынша әкімшілік хаттамалар толтырылды. Осакаровка аудандық соты іс материалдарын қарап, ер адамды бір жыл мерзімге көлік басқару құқығынан айырды және оған әкімшілік қамауға алу жазасын тағайындады.

Қарағанды облыстық ПД Патрульдік полиция батальонының командирі Медет Нұрмұханов жалған нөмір пайдалану – жай ғана жол ережесін бұзу емес, жауапкершіліктен жалтару үшін әдейі жасалған әрекет екенін атап өтті.

Полиция мемлекеттік тіркеу нөмірі көлік құралының негізгі сәйкестендіру құралы екенін еске салып, оны ауыстыру, жасыру немесе жалған нөмір пайдалану заңмен белгіленген жауапкершілікке әкеп соғатынын ескертті.

Бізді Google-дың негізгі дереккөздер тізіміне қосыңыз