СІМ 14 қазақстандықтың соғыс қимылдары аймағынан шығарылғаны туралы ақпаратты теріске шығарды

Әлеуметтік желілерде 14 Қазақстан азаматы бүгін қақтығыс аумағынан Қазақстанның Ресейдегі елшілігіне жеткізіледі деген расталмаған мәлімет тарап жатыр. Сыртқы істер министрлігі бұл ақпарат шындыққа сәйкес келмейтінін ресми түрде мәлімдеді, деп хабарлайды Tengrinews.kz.

Бұл туралы ведомствоның ресми өкілі Жанболат Үсенов Telegram-арнасында мәлім етті.

"Бұл тақырыптың қоғам үшін, әсіресе азаматтарымыздың туған-туыстары үшін қаншалықты маңызды екенін толықтай түсінеміз. Сондықтан тексерілмеген мәліметтерді таратуға мүлдем жол берілмеуі тиіс. Мұндай ақпарат жақындарынан хабар күтіп отырған отбасыларды адастырады, негізсіз үміт тудырады әрі азаматтарды қорғау жөніндегі Министрліктің жұмысына кері әсерін тигізуі мүмкін", - деп жазды Үсенов.

Ол министрлік Ресей тарапымен түрлі деңгейде жұмысын жалғастырып келетінін атап өтті.

"Мәселе тұрақты бақылауда. Бұл жұмыстың нәтижелері туралы СІМ қосымша хабарлайды", - деп толықтырды ресми өкіл.

Ведомство азаматтар мен БАҚ өкілдерін тек ресми дереккөздерге сүйенуге шақырды, сондай-ақ жалған ақпарат таратқаны үшін жауапкершілік көзделгенін еске салды.

Бұған дейін Сыртқы істер министрлігі соғыс қимылдары аймағындағы қазақстандықтардың өтініші бойынша жұмысты жалғастырып жатқаны хабарланған болатын. Оларды елге қайтару бойынша келіссөз жүргізіліп жатыр.

Тағы оқыңыз:СІМ Ресейдегі соғыс қимылдары аймағындағы қазақстандықтар туралы жазбаға пікір білдірді

Бізді Google-дың негізгі дереккөздер тізіміне қосыңыз