Жаңа түстегі iPhone 18 Pro оңа бастады . Бұл немен байланысты?

Жаңа iPhone 18 Pro иелерін техникалық сипаттамаларымен ғана емес, өзге де жайттармен таңғалдыра бастады. Желіде смартфондардың суреттері пайда болды, пайдаланушылардың айтуынша, уақыт өте келе құрылғы корпусының түсі айтарлықтай өзгерген. Tengri Life сарапшымен бірге бұл жағдайдың себебін және мәселенің расында корпус жабынына қатысы бар-жоғын анықтап көрді.

iPhone 18 Pro-да қандай ақау шықты?

Кейбір iPhone 18 Pro және 18 Pro Max иелері Reddit танымал интернет-платформасында смартфон корпусының алғашқы түсі өзгергені түсірілген суреттерді жариялай бастады. Мәселе Burgundy (шарап түстес) моделі туралы болып отыр.

Ұсынылған суреттерге сәйкес, кейбір аппараттарда камера блогы айналасындағы корпус бөлігі айтарлықтай ағарып кеткен немесе қызғылт реңкке өзгерген.

Бірқатар пайдаланушы қара түсті модельдерде де осындай әсер байқалғанын хабарлап жатыр. Иелерінің айтуынша, түстің өзгеруі алдымен камера айналасында пайда болып, кейін корпустың басқа бөліктерінде де байқала бастайды.

Скриншот: Reddit

Бұл ретте iPhone 18 Pro корпусы түсінің өзгеруін жаппай сипат алды деуге әлі ерте. Сатылған құрылғылардың жалпы санына шаққанда мұндай жағдайлардың нақты саны белгісіз, ал Burgundy (шарап түстес) моделін ұстайтын кейбір иелері ешқандай өзгеріс байқамаған.

Біз пікір алу үшін Астанадағы сервистік орталықтар желісінің негізін қалаушы Әлішер Есембаевқа жүгіндік. Сарапшының пайымдауынша, мәселе алюминийде емес, корпус жабынында немесе оны анодтау (алюминий корпусты өңдеу және бояу технологиясы) процесінің ерекшеліктерінде болуы мүмкін.

Анықтама: Ресми түрде Apple компаниясы iPhone 18 Pro корпусы алюминийден (aluminum unibody design) жасалғанын көрсетеді.

"Корпус жабыны уақыт өте келе қызу, ультракүлгін сәуле, химиялық заттар мен механикалық әсерлер салдарынан түсін өзгертуі немесе қажалуы мүмкін. Меніңше, мәселе алюминийде емес, дәл осы жабынның сапасы мен төзімділігінде", - деп атап өтті ол.

Есембаев iPhone 18 Pro корпусын жасау және бояу технологиясы алдыңғы буынға ұқсас екенін айтты. Оның пікірінше, сондықтан кейбір түстерде жабынның зақымдану қаупі сақталуы мүмкін.

Сарапшының сөзінше, олардың сервистік орталықтарына iPhone 18 Pro корпусының түсі өзгеруіне қатысты шағым әзірге түспеген. Дегенмен, оның мәліметінше, басқа пайдаланушыларда мұндай жағдайлар кездескен - осындай бірнеше өтініш туралы белгілі.

Қазір Apple бұл жағдайға қатысты ресми түсініктеме берген жоқ.

Бұл ретте Apple iPhone-ды тазалау жөніндегі нұсқаулығында құрылғымен жанасатын материалдардан корпуста және шыныда із қалуы мүмкін екенін, ал кейбір ластану дақ немесе зақымдануға әкелетінін ескертеді. Компания смартфонды жұмсақ, сәл дымқыл, түгі жоқ матамен тазалауды және агрессивті заттарды қолданбауды ұсынады.

Бұған дейін Қазақстандағы жаңа iPhone 18 иелері құрылғыларды тіркеу кезінде қиындықтарға тап болған еді. IMEI-верификацияға жауапты компания мұның себебін түсіндірді.

Бізді Google-дың негізгі дереккөздер тізіміне қосыңыз