СІМ Ресейдегі соғыс қимылдары аймағында қалған қазақстандықтар туралы жазбаға қатысты пікір білдірді

Қазақстан СІМ әлеуметтік желілерде тарап жатқан Ресейдегі соғыс қимылдары аймағындағы отандастар туралы хабарламаға пікір білдірді, деп хабарлайды Tengrinews.kz.

Бұл мәселеге қатысты мәлімдемені жұма, 2 қазанда сыртқы саяси ведомствоның ресми өкілі Жанболат Үсенов Telegram-арнасында жариялады.

"Сыртқы істер министрлігі бұл жағдайды назарда ұстап отыр. Қазақстан азаматтарының шетелдегі құқықтары мен бостандықтарын және заңды мүдделерін қорғау министрлік қызметінің сөзсіз басымдығы", - деді ол.

Бұл ретте Үсенов СІМ әлемнің түрлі елдері мен өңірлеріндегі соғыс қимылдары болып жатқан аймақтардан отандастарымызды қайтару бойынша тәжірибе жинақтағанын атап өтті.

"Осыған байланысты Қазақстан азаматтары туралы толық әрі нақты ақпаратты бұқаралық ақпарат құралдары арқылы емес, олардың өздерінен немесе туыстарынан тікелей алудың маңызы ерекше. Бірқатар отбасы министрлікке көмек сұрап өтінішпен жүгініп үлгерді. Соғыс қимылдары жүрiп жатқан аймақта жүрген қазақстандықтардың туыстарынан келетін өтініштерді қабылдау үшін министрлікте арнайы жедел желі жұмыс істейді", - деп түсіндірді ол.

СІМ ресми өкілі БАҚ-тан тиісті байланыс деректерін таратуға жәрдемдесуді сұрады.

"Азаматтарды құқықтық қорғаумен қамтамасыз ету үшін министрлікке толық ақпарат, яғни олардың тегі мен аты-жөні, туған күні, болжамды орналасқан жері, сондай-ақ олар жасаған еңбек шарттарының талаптары туралы мәліметтер қажет", - деп толықтырды ол.

Оның айтуынша, қазақстандықтарды еліне қайтару жөніндегі бірлескен шараларды әзірлеу мақсатында СІМ Ресей тарапымен консультацияларды жалғастырып жатыр. Бүгін Қазақстан Сыртқы істер министрі Ресейдің Қазақстандағы уақытша сенімді өкілімен кездесті. Жақын арада Қазақстанның Ресейдегі елшісі Ресей Сыртқы істер министрлігінің және Қорғаныс министрлігінің басшылығымен кездесулер өткізеді. Жүргізіліп жатқан жұмыстың барысы мен нәтижелері туралы қосымша хабарланады.

Бізді Google-дың негізгі дереккөздер тізіміне қосыңыз