Ақша жинау және құрылыстағы жұмыс: желіде Атырау СОБР басшылығына тағы да шағымданды

Әлеуметтік желіде Атырау облысы Полиция департаменті жылдам қимылдайтын арнайы жасақ (СОБР) басшылығының үстінен шағым түсірілген кезекті үндеу пайда болды. Оның авторлары өздерін бөлімше қызметкерлері деп атайды және Президент Қасым-Жомарт Тоқаев пен ІІМ басшылығына жүгінеді, алайда олардың есімдері жарияланымда көрсетілмеген.

Бұл жолғы шағым СОБР командирі Еркебұлан Сапанов пен рота командирі Ерік Қарабаевқа бағытталған. Авторлар ақша жинау, лауазымдық өкілеттіктерді асыра пайдалану, еңбек заңнамасын бұзу және қызметкерлерді құрылыс пен шаруашылық жұмыстарына тарту туралы мәлімдейді.

Үндеуде офицерлерді жұмыстан шығару немесе қызметте қысым көрсету қаупімен траншеялар мен әжетханалар қазуға, ғимараттарды сырлауға және «Дубай-челлендж» жарысын өткізуге арналған полигон салуға мәжбүрлегені айтылады.

«Бізден қолма-қол ақшалай 15 000 теңгеден жинап алды. Барлық шығын материалдары, шеге, турникет, көлікке жанармай, 39–40 градус ыстықта стяжканы өз күшімізбен құйдық», — делінген үндеуде.

Авторлардың айтуынша, бұл жұмыстар қызмет уақытында да, бос уақытта да орындалған. Сонымен қатар олар іс-шараны өткізуге бюджеттен 10 млн теңге бөлінді деп отыр.

Үндеу авторлары болған жағдайды лауазымдық өкілеттіктерді асыра пайдалану деп есептейді және прокуратура мен ҰҚКД-ға шағымданғаннан кейін кейбір қызметкерлерге қызметте қысым жасала бастады деп мәлімдейді. Олар басшыларды теріс уәждермен жұмыстан босату мәселесін қарауды және баяндалған фактілерге қылмыстық-құқықтық баға беруді талап етеді.

Атырау облысы Полиция департаментінің баспасөз қызметі желіде жарияланған ақпаратты растамады.

— Өзіндік қауіпсіздік басқармасы жүргізген тексеру барысында аталған жарияланымда көрсетілген уәждер расталмады. Бұдан бөлек, тәртіптік өндіріс үшін қандай да бір негіздер анықталған жоқ, — деп хабарлады баспасөз қызметі.

Полицияда сондай-ақ тексерілмеген ақпаратты таратпауға және ресми дереккөздерге жүгінуге шақырды.

Бұл — әлеуметтік желіде авторы көрсетілмей пайда болған алғашқы үндеу емес.

Осы жылдың сәуір айының басында желіде видео тараған еді, онда СОБР басшылары қызметтік кабинетте бағыныштыларын балағаттау сөздерін қолдана отырып ұрысқаны айтылған. Кадрлардан қызметкерлердің бірін бетінен ұрып, кейін оған сауытпен (бронежилетпен) соққы жасалғаны да көрінеді.

Қызметтік тексеруден кейін полиция қызметтік әдеп бұзылғанын растады. Нұрбахыт Басаров ішкі істер органындағы қызметінен босатылды, қалған қызметкерлерге қызметіне толық сәйкес еместігі туралы ескерту жарияланды. Кезекті үндеуде авторлар осы эпизодқа да сілтеме жасап, оған қылмыстық-құқықтық баға берілуі керек еді деп есептейді.

СОБР-да ақша жинау бойынша шағымдар бұған дейін де пайда болған. 2023 жылы анонимді авторлар қызметкерлерден жүйелі түрде ақша жинау туралы мәлімдеген еді, бірақ ол кезде полиция тексеру уәждері расталмағанын хабарлаған.

2024 жылдың сәуірінде кезекті жарияланымнан кейін ақша жинау деректерінің бірі шынымен де орын алғаны белгілі болды. Полицияның берген мәліметі бойынша, ол әңгіме біржолғы ерікті көмек туралы болған: 2021 жылдың сәуірінде СОБР қызметкерлері полиция полковнигі Ж. Шариповтың әкесінің қайтыс болуына байланысты 5 мың теңгеден жинаған. Барлығы 429 мың теңге жиналған.

Айнұр САПАРОВА

6 қазан, 11:58