ҚазҰУ педагогын студенттердің көз алдында жұмыстан шығарды: ЖОО видеоға қатысты түсініктеме берді

Әлеуметтік желілерде әл-Фараби атындағы ҚазҰУ-да сабақ үстінде студенттердің көзінше оқытушыға жұмыстан босатылғаны туралы хабарланған сәт түсірілген видео тарады. Кадрлар қоғамда резонанс тудырды. Желі қолданушыларының көбі оқытушыға ескерту қандай форматта берілгеніне назар аударды. Университет бұл жағдайға қатысты түсініктеме берді, деп хабарлайды Tengrinews.kz тілшісі.

Сабақ үстінде жұмыстан шығарды ма?

Желіде тараған видеодан ер адам сабақ кезінде әйелге 2 қазанмен мерзімделген құжаттарды тапсырып жатқанын көруге болады. Жазба авторлары әйел университетте оқытушы болып жұмыс істейтінін айтады.

Жазбада педагог жұмыстан шығару себебін сұрап жатқаны да естіледі.

"Не себепті жұмыстан шығарасыздар?.. Бүгін 7 қазан, неге 2-сінен бастап маған ескертілмеген?.. Сіздер мені таныстыруға міндетті құжаттармен таныстырған жоқсыздар... Мен сіздерге келдім, бірақ сіздер маған құжаттарды көрсетуден бас тарттыңыздар..." - дейді видеодағы әйел.

Ер адам оған бірдеңе деп жауап береді, бірақ не айтқаны дұрыс естілмейді.

Видео резонанс тудырып, қазақстандықтар арасында қызу талқыланды. Қолданушылар жұмыстан шығарудың мұндай жария әдісін этикаға жат деп санап, мұндай мәселелер камерасыз, жеке тәртіпте шешілуі тиіс екенін атап өтті.

ҚазҰУ оқытушының жұмыстан шығарылуына қатысты видеоны түсіндірді

Әл-Фараби атындағы ҚазҰУ видео 7 қазанда, яғни оқытушымен еңбек қатынастары тоқтатылғаннан кейін түсірілгенін хабарлады. Бұл уақытта кафедра меңгерушісі оның орнына басқа оқытушыны тағайындап қойған.

"Осыған қарамастан, оқытушы аудиторияға өз бетінше кіріп, тағайындалған мұғалімнен шығуын талап етіп, сабақты өткізуге кіріскен", - деп хабарлады жоғары оқу орны.

Олардың айтуынша, келген кадр бөлімінің өкілі әйелге жағдайды талқылау үшін дәлізге шығуды ұсынған. Алайда ол әңгіме тікелей аудиторияда, студенттердің көзінше өтуін талап еткен.

"Университетте бар мәліметтерге сәйкес, видеоны оқытушының өтініші бойынша студенттер түсірген", - деп атап өтті ҚазҰУ.

Университет сабақ кезінде кадрлық құжаттарды жария түрде тапсыруға бастамашы болмағанын атап өтті.

Сонымен қатар ЖОО әкімшілігі видеодағы оқытушының бұйрықпен таныстырудан бас тартты деген мәлімдемесіне қатысты пікір білдірді. Университет мәліметінше, педагогпен еңбек қатынастарын тоқтату туралы бұйрық тәртіптік комиссияның шешімі негізінде 2026 жылдың 2 қазанында шығарылған.

"Оқытушы комиссия отырысы туралы хабардар болды және өз түсініктемелері мен ұстанымын ұсынуға мүмкіндігі болды, бірақ отырысқа қатысқан жоқ", - деп хабарлады ЖОО өкілдері.

Университет ақпараты бойынша, бұйрықтың көшірмесі заңнамада белгіленген мерзімде оқытушының тұрғылықты жеріне пошта арқылы жіберілген.

Жұмыстан шығару себебі неде?

ҚазҰУ еңбек қатынастарын тоқтату туралы шешім оқытушының 2024–2026 жылдардағы жұмысында анықталған бірқатар олқылыққа байланысты екенін хабарлады.

"Университет иелігіндегі материалдарға сәйкес, Univer жүйесінің ақпараттық қауіпсіздік талаптарын бұзу, соның ішінде жекелеген оқытушылық міндеттерді орындау үшін студенттерге оқытушының есептік жазбасына рұқсат беру жағдайлары анықталды", - деп хабарлады ЖОО.

Бұдан бөлек университет оқу-әдістемелік материалдарды дайындау, емтихан тапсырмаларын әзірлеу, сабақтарды өткізу және емтихан жұмыстарын тексеру талаптарының бұзылғанын мәлімдеді. Әкімшіліктің мәліметінше, кейбір жағдайлар емтихан сессияларын уақтылы өткізуге және студенттердің академиялық құқықтарының сақталуына қауіп төндірген.

Баспасөз қызметінің хабарлауынша, ЖОО-ның алаңдаушылығына себеп болған тағы бір жайт студенттерді, соның ішінде кәмелетке толмағандарды оқытушының университетпен арадағы жеке еңбек дауына тартуы болды.

"ҚазҰУ студенттер жеке немесе еңбек дауларын шешу құралына айналмауы тиіс, ал олардың оқытушыға академиялық тәуелділігі соңғысының мүддесі үшін пайдаланылмауы керек деген ұстанымда", - деп атап өтті әкімшілік.

Сондай-ақ университет жағдайды реттеу және еңбек пен педагогикалық тәртіптің сақталуын қамтамасыз ету үшін шаралар қабылданғанын хабарлады. Атап айтқанда, оқытушымен түсіндіру жұмыстары жүргізіліп, тәртіптік шаралар қолданылған.

Хаттама толтырылды

Сонымен қатар ҚазҰУ 17 қазанда учаскелік полиция инспекторы ӘҚБтК-нің 456-2-бабының 3-бөлігінде көзделген іс-әрекет белгілері бойынша әкімшілік құқық бұзушылық туралы хаттама толтырғанын хабарлады.

Анықтама. Әкімшілік құқық бұзушылық туралы кодекстің (ҚР ӘҚБтК) 456-2-бабының 3-бөлігі онлайн-платформаларды пайдаланушылардың жалған ақпарат орналастырғаны немесе таратқаны үшін жауапкершілікті көздейді.

Жоғары оқу орны мән-жайға қатысты түпкілікті құқықтық бағаны заңнамада белгіленген тәртіппен уәкілетті органдар беретінін атап өтті.

Еске сала кетейік, сәуірде еліміздегі ең ірі жоғары оқу орындарының бірінде деректер таралып кеткені хабарланған болатын. Желіде әл-Фараби атындағы Қазақ ұлттық университеті студенттерінің жеке мәліметтері жарияланған. Ашық қолжетімділікте білім алушылардың аурулары, тәртіп бұзуы туралы құжаттар, олардың есімдері мен факультеттер атауы пайда болды.

Бізді Google-дың негізгі дереккөздер тізіміне қосыңыз

Қосу