Қонжыққа Хабар деп ат қойды

Өскемендегі хайуанаттар бағына қонжық келді. Бірнеше күн Риддердегі саяжай маңынан шықпай жүрген жыртқышты сол маңдағы тұрғындар байқап, жедел топ қызметкерлеріне хабар берген.

Мамандар дереу іске кірісіп маймақты облыс орталығына жеткізді. 5-6 айлық күшік енесінен айырылып қалғанға ұқсайды. Сондықтан оның жабайы ортаға бейімделіп кетуі екіталай. Енді бақ қызметкерлері оған толық қамқорлық көрсетеді.

Риддердегі саяжай маңы бұл қонжық үшін нағыз қорек көзіне айналыпты. Күн сайын кешке келіп, тұрғындар қойған тамақ қалдықтарымен азықтанып жүрген. Енесінен айырылған маймақтың қыстан шыға алмасын түсінген жедел топ өкілдері оны торға салып хайуанаттар бағына жеткізді.

Сергей Карманников, «Орман және аңшылық шаруашылығы жедел қимыл отряды» бастығының орынбасары:

- Куәгерлер жақын маңдағы теміржол бойынан үлкен аюдың өлексесін көріпті. Ол осы қонжықтың енесі болуы мүмкін деген болжам бар. Қонжыққа ең алдымен ұйықтататын екпе салып әкелеміз деп ойладық. Алайда ол біз дайындаған торға өзі кірді. Сол себепті еш қиындықсыз тасымалдадық.

«Қанша кішкентай болғанмен, жыртықштың аты жыртқыш,сондықтан қауіпсіздікті ұмытпау керек», - дейді мамандар. Түз тағысы осыны растағандай, бізге де мінезі көрсетті.

Хайуанаттар бағына сырттан қосылған аң-құс мұқият тексерістен өтеді. Ең алдымен карантинге оқшауланады.

Жұмағали Кәдірбаев, ветеринар:

- Көріп тұрсыздар, кішкене «отдышкасы» бар, оның бәрін қараймыз, байқаймыз, керек болса дәрілерін береміз, енді емдеп қатарға қосылуына іс әрекет жасаймыз.

Қонжық мұнда жабайы табиғаттан аяқ асты әкелінген алғашқы аң емес. Мәселен мына аю да осыдан 7 жыл бұрын Риддер жақтан жеткізіліпті. Абай облысындағы ормандағы өрт ортасынан құтқарылған сусар да осы жерді паналап жүр. Жұмысшылар орын тар болса да, әрбір тіршілік иесіне көмектесуге дайын.

Нұрлан Садуақасов, Хайуанаттар бағының бөлім меңгерушісі:

- Қоятын жер қиындығы. Өйткені әрқайсы бөлек тұру керек. Мысалы, қонжықты үлкен аюдың қасына қоса алмаймыз, әрқайсына бір-бір вольер керек.

Күтпеген қонаққа ат та табылды. «Хабар» агенттігінің 30 жылдық мерейтойымен тұспа-тұс ортаға қосылған ол «Хабар» деген атты еншіледі.   

«Хабардың» ортаға бейімделуі үшін әлі біршама күтуге тура келеді дейді мұндағы қызметкерлер.

Қонжық енді бір айдай осы жерде ел көзінен тасада тұратын болады. Өйткені көпшілік назары оның психологиялық жай күйіне, жалпы мінезіне кері әсерін тигізуі мүмкін. Ал бір қалыпқа түсіп, ортаға әбден бойы үйренген соң оған жеке тор беріледі. Сөйтіп хайуанаттар бағында өз орнын алады.

Авторлары: Эльмира Ахметова, Жігер Бабаханов