Қорқорды Денсаулық сақтау министрлігі заңдастырғысы келеді, ал Спорт министрлігі қарсы

Туризм және спорт министрі Ербол Мырзабосынов Қазақстанда қорқорды (кальян) заңдастыру мүмкіндігіне үзілді-кесілді қарсы шықты. Ол ведомствоның бұл ұстанымын Үкіметте өткен баспасөз мәслихатында мәлімдеді.

Бұған дейін Денсаулық сақтау министрлігі елдегі қорқордың мәртебесін өзгертуі мүмкін заң жобасын дайындап жатқаны белгілі болған еді. Журналистер спорт ведомствосының басшысынан мұндай жеңілдіктерге қалай қарайтынын сұрады.

Мырзабосынов бүгінгі таңда Қазақстанда ресми тыйым қолданыста екенін және министрлік бұл бағытты өзгертуді жоспарлап отырмағанын еске салды.

«Заң бойынша қоғамдық орындарда қорқор шегуге тыйым салынған. Біз өз тарапымыздан оны тұтынуға қарсымыз — біз салауатты өмір салтын қолдаймыз, белсенді қозғалысты жақтаймыз», — деп кесіп айтты Ербол Мырзабосынов.

Елдегі мейрамханалар мен дәмханаларда қорқор шегуге қолданыстағы тыйымға қарамастан, қоғам белсенділері мен полиция Қазақстанның мегаполистерінде жүргізілген түнгі рейдтер барысында жүздеген заң бұзушылықтарды жиі анықтайды. Осы жағдай аясында Денсаулық сақтау министрлігінің бұл саланы реттеу және ықтимал заңдастыру туралы бастамасы қоғамда қызу пікірталас тудырды.

Бүгін, 16:38