Қазақстанға кім және не үшін емделуге келеді Денсаулық сақтау министрлігі статистиканы жариялады

Кейінгі бес жылда Қазақстанға медициналық көмек алу үшін келетін шетелдік пациенттер қатары 4,5 есе өсті. Осыған байланысты Денсаулық сақтау министрлігі бұл процесті реттеу үшін медициналық туризмді дамытудың бірыңғай мемлекеттік моделін әзірлеп жатыр, деп хабарлайды TengriHealth Денсаулық сақтау министрлігінің баспасөз қызметіне сілтеме жасап.

Емделуге кімдер келеді?

Денсаулық сақтау министрлігінің мәліметінше, ең көп өсім Ресей, Қытай, Үндістан және Түркиядан келген пациенттер есебінен болған. Сонымен қатар министрлік Қырғызстан мен Өзбекстаннан келетін пациенттер ағыны тұрақты екенін атап өтті.

Ұлттық статистика бюросының деректеріне сүйенсек, 2022 жылдың өзінде шетелдік туристердің шамамен екі пайызы Қазақстанға медициналық көмек алу мақсатында келген. Ол кезде мұндай пациенттердің негізгі бөлігін ТМД елдерінің азаматтары құраған.

Денсаулық сақтау министрлігінің ақпараты бойынша, кардиохирургия, нейрохирургия, онкология, репродуктивті медицина, пластикалық хирургия, стоматология, жоғары дәлдіктегі диагностика, Check-up бағдарламалары мен санаторлық-курорттық емдеу ең сұранысқа ие бағыттар болып отыр.

Шетелдік пациенттер санының артуына қарамастан, министрлік бұл саланың дамуына бірыңғай ұйымдастыру жүйесінің жоқтығы кедергі келтіреді деп есептейді.

"Жекелеген клиникалар, заманауи технологиялар мен шетелдік пациенттер бар, бірақ бірыңғай маршрут, түсінікті қызмет пакеттері, халықаралық деңгейде белсенді ілгерілету және әрбір өңір мен медициналық ұйымның жауапкершілігі нақты айқындалмаған. Сондықтан әрбір қатысушының функциялары бекітілген бірыңғай модельді әзірлеу қажет", - деп атап өтті кеңес барысында Денсаулық сақтау бірінші вице-министрі Тимур Сұлтанғазиев.

Денсаулық сақтау министрлігі қазіргі уақытта медициналық туризмді дамытудың бірыңғай мемлекеттік моделі әзірленіп жатқанын хабарлады.

Бұл модель медициналық туристер ағынын есепке алуға арналған цифрлық платформа құруды, бірыңғай операциялық терезе ашуды, сапаның бірыңғай стандарттарын енгізуді, сондай-ақ шетелдік пациенттерді түсінікті бағыт бойынша толық сүйемелдеуді қарастырады.

Бұған дейін біз әлемдегі ең үздік медициналық жүйесі бар елдерде тұратын адамдар неге бізге келіп емделуді жөн көретінін, оларды не қызықтыратынын және медициналық туризмді қай бағытта дамытуға болатынын анықтап көрген болатынбыз.

Тағы оқыңыз: Сәтсіз пластикалық ота немесе стоматологиялық қызмет үшін қалай өтемақы өндіріп алуға болады?

Google News арқылы жаңалықтарымызды қадағалаңыз

Медицина

Туризм

көмек

Денсаулық