Қосшы бағытындағы LRT құрылысы жаңа кезеңге өтті

Астанада Қосшы қаласы бағытындағы Tarlan Astana (LRT) жүйесінің екінші кезегінің аралық құрылымдарын монтаждау жұмыстары басталды. Бүгін құрылысшылар алғашқы темірбетон арқалығын көтеріп, орнатты, - деп хабарлайды Tengrinews.kz City Transportation Systems (CTS) баспасөз қызметіне сілтеме жасап.

Компания мәліметінше, монтаждау жұмыстары үшін Қазақстанда алғаш рет арнайы көпір төсегіш пайдаланылды. Ол темірбетон арқалықтарды көтеріп, эстакада бойымен жылжытып, тіреулерге орнатады.

Instagram-дағы бұл жарияланымды көру

City Transportation Systems (@cts_kz) жарияланымы

CTS өкілдері бұл технологияны қолдану аралық құрылымдардың құрылысын жеделдетуге және жұмыс кезінде автокөлік жолдарын жабу жиілігін азайтуға мүмкіндік беретінін түсіндірді.

Жоба үшін жүк көтергіштігі 245 тонна болатын, зияткерлік басқару жүйесі және қашықтан басқару пультімен жабдықталған көпір төсегіш жасалған. Одан бөлек, құрылыс барысында ауыр темірбетон конструкцияларын монтаждауға арналған басқа да мамандандырылған техникалар қолданылып жатыр.

Еске салайық: Астанада жеңіл рельсті көлік (LRT) – Tarlan Astana құрылысы жалғасып жатыр. Осы жазда елорданы Қосшымен жалғайтын желіде жұмыстар басталды.

Айта кетейік, шілдеде Астанадағы жеңіл рельсті көлік (LRT) жүйесінің ресми атауы – Tarlan Astana болды. Жоба жүзеге асырылып жатқан көп жылдар ішінде елорда тұрғындары Astana LRT атауына үйреніп қалған еді. Алайда, бұл атау ресми емес, тек әлемнің әртүрлі елдерінде жүретін және LRT немесе жерүсті метросы деп аталатын көлік түрін ғана білдіретін болып шықты.

Google News арқылы жаңалықтарымызды қадағалаңыз