Қостанай облысында Ш. Уәлихановтың 190 жылдығына орай мәдени рухани іс шара өтті

Қостанай облысының Сарыкөл ауданында Шоқан Уәлихановтың 190 жылдығына арналған мәдени-рухани іс-шара өтті.

Алқалы жиын барысында ағартушы ғалымның мұрасы, ғылыми еңбектері сараланды. Ал арнайы жасақталған этноауыл аумағында ән-жырдан шашу шашылып, спорттық жарыстар ұйымдастырылды.

Шоқан Уәлиханов – қазақ мәдениетін әлемге танытқан ғалым. Оның саяхат күнделіктері ғылыми тұрғыда үлкен маңызға ие.

Қалқаман Жақып, профессор:

- Шоқанды терең зерттеген Әлкей Марғұлан сөзімен айтатын болсақ, Шоқан Уәлихановтың ғылыми мұрасы отандық ғылымның алтын қоры деген. Шоқан полиглот, Шоқан қазақтан шыққан тұңғыш суретші. Шоқан ағартушы демократ. Гуманист, адамзат тағдырын ойлаған әділ, адал тұлға. 

Шоқанның туған жері, дүниеге келген күні, қызметіне қатысты кереғар пікірлер айтылып жүр. Зерттеушілер әсіресе Омбыда оқыған кезеңінің әлі күнге ашылмай жатқан құпия тұстары көп дейді.

Солдат Дүтбаев, Сарыкөл аудандық ардагерлер кеңесінің төрағасы:

- Шоқанның журналын тексергенде кейбір сабақ кезінде, ол кісі сабақта болмаған дейді. Сонда сұрадық дейді тарихшылардан, сонда сабаққа неге қатыспаған деп. Себебі Шоқанға 12 жастан бастап, әдейілеп, сабақ берген, себебі Шоқанды сол басынан бастап, барлаушы ретінде ақ патшаның үкіметі дайындаған екен. 

Деректерге сүйенсек, Шоқан Уәлиханов 1835 жылдың қараша айында қазіргі Сарыкөл ауданындағы Күнтимес деген мекенде дүниеге келген. Биыл туғанына 190 жыл толып отыр. Қазақ халқының сан ғасырлық мәдени мұрасын жүйелеп, оны әлемге танытқан жерлесіміздің Қостанай облысында бір ескерткіші болмауы бүгінгі ұрпаққа сын, дейді жиынға қатысушылар. 

Бақытжан Нарымбетов, облыс әкімінің орынбасары: 

- Қостанай облысында біздің облыс орталығында Шоқанның ескерткіші болмауы, әрине, біз үшін үлкен сын. Сондықтан да алдағы уақытта Күнтимес бағытында да, Сарыкөл ауданында туған жері деп көрсете алатындай бізде өзіміздің шараларымызды, инфрақұрылымдық жобаларымызды жасақтауымыз керекпіз. Оны енді алдағы уақытта өздеріңізбен бірге ақылдасып, жүзеге асырамыз деген ойдамын.  

Шоқанның туған жері Сарыкөл ауданында бастау алған мерейтойлық шара аясында этноауыл жасақталды. Ол жерде ұлттық құндылықтарымыз, дәстүріміз дәріптелді. Ал облыстық денгейде Шоқан Уәлихановтың 190 жылдығын қараша айында Қостанайда атап өту жоспарланып отыр.

Мағауия Қалиев, Сергей Трахтенберг