Абай облысында Республика күніне орай салтанатты шара өтті

Абай облысында Республика күніне арналған салтанатты шара өтті.

Атаулы мерекеге орай ұйымдастырылған жиынға облыс басшылығы, еңбек ардагерлері, жастар мен қоғам белсенділері қатысты. Өңірде биыл мыңға тарта баспана берілген. Жаңа мектептер мен түрлі әлеуметтік нысандар бой көтеріп жатыр. Жаңадан құрылған облыс орталығында 75 мың тұрғынға арналған ықшам аудан салу жоспарланған. Республика күніне арналған «Қыран елім – Қазақстаным!» атты мерекелік концерт кезінде әр салада жылдар бойы еңбек етіп, ел дамуына үлес қосқан жандар марапатталды.

Егемендіктің 35 жылдығына арналған бұл кеш ел рухын көтеріп, бірліктің мәнін айшықтады. Бұл мерейлі дата - еліміздің егемендік декларациясын қабылдаған күн.

Берік Уәли, Абай облысының әкімі:

- Президентіміз тәуелсіздіктің бастауында тұрған осы қастерлі датаның маңызын арттырып 2022 жылы қайтиа жаңғыртқанын жақсы білесіздер. Жер жаратылғанн бері мыңдаған ұлттардың аңсаған арманы азаттық. Ең аяулы аңсары тәуелісздік екені белгілі. Сіздерді еліміздің ең ұлық ең негізгі мерекесі Республика күнімен шын жүректен құттықтаймын.

Салтанатты жиында өңірдің дамуына сүбелі үлес қосқан азаматтарға мемлекеттік марапаттар табысталды. Олардың арасында ақын-жазушылар, өңірдің дамуына атсалысып жүрген кәсіпкерлер мен қарапайым еңбек адамдары бар.

Төлеген Жанғалиев, ақын:

- Бұл маған берілген баға деп ойламаймын мен. Бұл кеше ғана 180 жылдығы аталып өткен Абай бабамызға, Абай еліне, жерлестеріне мен бір ғана ақынымын сол елдің. Сол елге беріліп жатқан баға деп ойлаймын. Мерекеміз құтты болсын! 

Владимир Виничук, шаруа қожалығының иесі:

- Бүгін айтулы мереке қарсаңында барша жерлестерімді шын жүректен құттықтаймын. Еліміз аман, жұртымыз тыныш болсын. Тәуелсіз еліміздің көк аспаны әрдайым ашық, бейбітшілік мәңгі орнасын. Татулық пен түсіністік бар жерде алынбас асу, шешілмес мәселе болмайды. 

Салтанатты жиын «Қыран елім Қазақстаным!» атты концертпен жалғасып, сахнадан патриоттық рухтағы әндер шырқалды. Семей төрінде өткен мерекелік концерт ел тәуелсіздігінің қадірін айшықтап, жұртшылыққа ерекше рух пен жігер сыйлады. 

Рүстем Қайратұлы, Медет Өмірханов