Қостанай облысында такси жүргізушісіне шабуыл жасаған екі тұрғын сотталды

Қостанай облыстық сотының баспасөз қызметінің хабарлауынша, сотталушылар 2025 жылдың 16 қыркүйегінде мас күйінде гаражға кіріп, ГАЗ-24 көлігін ұрлап кеткен. Көлікті жүргізу кезінде жүргізуші тізгінге ие бола алмай, көлік ағашқа соғылған. Кейін ер адамдар көлікті тастап, қашып кеткен.

Кейінірек олар басқа гаражға кіріп, Great Wall автокөлігін ұрлап кеткен, бірақ көлік бұзылғандықтан оны Рудныйдан шыға берісте тас жолда қалдырып кеткен.

Олар бірнеше күннен кейін, яғни 2025 жылдың 19 қыркүйегінде такси жүргізушісі әйелге шабуыл жасап, оның Hyundai Accent және iPhone 14 Pro Max ұялы телефонын ұрлады.

Айыпталушылар көлік ұрлаудағы кінәсін ішінара мойындады, бірақ қарулы тонауға қатысы жоқтығын айтты. Жәбірленушілер үкім шығаруды сотқа қалдырды.

Қылмыстың бірнеше рет қайталануын және барлық оқиғалардың мас күйінде жасалғанын ескере отырып, сот екі айыпталушыны 11 және 9 жылға бас бостандығынан айырды. Сотталғандар жазасын қатаң режимдегі мекемелерде өтейтін болады. Жәбірленушілердің азаматтық талаптары толығымен қанағаттандырылды.

Үкім заңды күшіне енген жоқ.

Осыған дейін Алматыда ер адам азық-түлік дүкенінде әйелге қарақшылық шабуыл жасаған еді.