Қостанай тұрғыны кәмелет жасына толмағандарға заңсыз діни сабақтар өткізген

АСТАНА, 22 желтоқсан - Sputnik. Қостанайда қайырымдылық атын жамылған заңсыз діни қызмет анықталды, деп хабарлайды облыстық полиция департаменті.

Тексеру барысында полиция, прокуратура және әкімдік жанындағы дін істері басқармасының қызметкерлері діни қатынастар саласындағы заңнама талаптарының бұзылғанын анықтады.

"Қаладағы жеке үйлердің бірінде Ақмола облысының 23 жастағы тұрғыны діни сабақтар мен ғұрыптар өткізген. Оған кәмелетке толмағандарды қатыстырған. Сабақтар діни бірлестік мәртебесі жоқ әрі діни қызмет жүргізуге арналмаған қайырымдылық ұйымының ғимаратында өткен", - дейді полицияда.

Ер адам "қайырымдылық" ұйымының атауын жамылып, тіркеусіз діни оқытып, миссионерлік қызмет жүргізген. Сондай-ақ діни әдебиеттер пайдаланылған.

Бұған дейін сот бұл ұйымды тарату туралы шешім шығарған.

Діни қызмет туралы заңнаманы бұзу дерегі бойынша сот ер адамды екі әкімшілік құқық бұзушылық жасағаны үшін кінәлі деп таныды.