Қостанайда жасөспірімнің әрекетінен жолаушылар пойызы шұғыл тоқтауға мәжбүр болды

АСТАНА, 26 қаңтар – Sputnik. Жасөспірімнің әрекеті салдарынан "Қостанай - Алматы" жолаушылар пойызы шұғыл тоқтауға мәжбүр болды, деп хабарлайды Қостанай облыстық соты.

9 қаңтарда жасөспірім басқа қатарластарымен бірге жаяу жүргіншіге арналмаған жерде темір жолға шыққан. Салдарынан "Қостанай – Алматы" бағытындағы жолаушылар пойызы шұғыл тоқтауға мәжбүр болды. Бұл қозғалыс қауіпсіздігіне нақты қатер төндіріп, пойыздың апатқа ұшырауын қоса алғанда, ауыр салдарға әкеп соғуы мүмкін еді.

Кәмелетке толмағанның қауіпсіздігін қамтамасыз етпеген ата-ананың мәселесі сотта қаралды. Әкімшілік істі Қостанай облысының кәмелетке толмағандардың істері жөніндегі мамандандырылған ауданаралық соты қарады.

"2010 жылғы жасөспірімнің ата-анасы өз міндеттерін тиісінше орындамаған. Атап айтқанда, ол ұлын тәрбиелеуден жалтарған, тұрмыста және қоғамдық орындарда қауіпсіз мінез-құлық қағидаларына үйретпеген, сондай-ақ оның бойында моральдық және адамгершілік құндылықтарды қалыптастырмаған", - дейді сотта.

Жасөспірімнің ата-анасы әкімшілік құқық бұзушылық жасағаны үшін кінәлі деп танылып, оған 43 250 теңге айыппұл салынды.