Қостанайлық автобус жүргізушісінің видеосы желіде қызу пікірталас тудырды

Әлеуметтік желілерде Қостанайдағы жолаушылар автобусының жүргізушісі түсірген видео пайда болды. Ер адам жолаушылардың бірінің әрекетіне ашуланып, әңгімесін балағат сөздермен жеткізген. Пікір қалдырушылардың бір бөлігі жүргізушіні қолдаса, полиция оны жауапқа тартты, деп хабарлайды Tengrinews.kz.

Қоғамдық көлік жүргізушісінің айтуынша, жол жүру кезінде жолаушы әйелдің баласының денсаулығы нашарлап, автобус салонында құсып жіберген. Ер адамның айтуынша, осыдан кейін әйел баласының құсығын тазалаудан бас тартқан.

Жүргізуші өз наразылығын видеоға түсіріп алған, бұл бейнежазба әлеуметтік желілерде тарап, қолданушылар арасында қызу талқыланды. Бұл ретте ер адам роликте бірнеше рет балағат сөз айтқан.

Бұл жарияланымды Қостанай облыстық полиция департаментінің қызметкерлері әлеуметтік желілерге мониторинг жүргізу кезінде байқаған.

"Видео авторының жеке басы анықталды. Ол автобус жүргізушісі болып шығып, ұсақ бұзақылық жасағаны үшін әкімшілік жауапкершілікке тартылды. Сот шешімімен оған 20 АЕК (2026 жылы 86 500 теңге) көлемінде айыппұл түріндегі әкімшілік жаза қолданылды", - деп хабарлады Tengrinews.kz тілшісіне Қостанай облыстық ПД баспасөз қызметі.

Полиция заңға қайшы әрбір әрекетке қатаң құқықтық баға берілетінін ескертті.

"Заң мен тәртіп баршаға ортақ", - деп түйіндеді полиция өкілдері.

Желі қолданушылардың пікірі екіге жарылды. Бірі жүргізушіні қолдап, жолаушы әйел расында баласының құсығын тазалауы керек еді деп есептейді. Басқалары оның әрекетін айыптап, мұндай жағдайға жол берілмеуі тиіс екенін айтты. Бұл ретте кейбір қолданушылар жүргізушінің айтқан сөздеріне шағымданды - оларды видеодағы балағат сөздердің көптігі ашуландырды.

Осыдан бірнеше жыл бұрын әлеуметтік желілерде зейнеткер қоғамдық көлікте тосап құйылған банкіні сындырып алған видео тараған еді. Оқиға Алматыда болған. Сол кезде жанында тұрған қыз жанжалды болдырмау үшін көмекке келіп, төгілген сұйықтықты өз киімімен сүртіп тастаған. Алайда басқа жолаушылар бұл жағдайды сынап, қыздың өзін автобус ішінде ұрысып тастаған еді.

Екі жолаушы әйел қарияны абайсыздығы үшін балағаттай бастаған. 15 жасар мектеп оқушысына мұндай мінез-құлық орынсыз болып көрініп, ол зейнеткерді жақтаған. Ол үстіндегі жемпірін шешіп, төгілген тосапты сонымен сүрткен.

Бізді Google-дың негізгі дереккөздер тізіміне қосыңыз