​​ҚТЖ машинисінің жұмыстан шығарылуы бойынша Конституциялық Сот қандай шешім шығарды

Конституциялық Сот Еңбек кодексінің 52-бабы 1-1-тармағы 2) тармақшасын қарастырып, оның Конституцияға сәйкестігін тексерді. 

Бұл нормаға сәйкес, квазимемлекеттік сектор қызметкері сыбайлас жемқорлық қылмыс жасаған жағдайда, еңбек шарты жұмыс берушінің бастамасымен міндетті түрде бұзылуы тиіс.

Азамат пара беру фактісі бойынша кінәлі деп танылып, мемлекеттік және квазимемлекеттік ұйымдарда лауазым атқару құқығынан өмір бойына айырылғандықтан жұмыстан шығарылған. Ол электровоз машинисі болып еңбек етіп келгенін, ал бұл шешім оның еңбек ету бостандығын шектейтінін алға тартты.

Конституциялық Сот норманы басқа заңдармен байланыста қарау қажеттігін атап өтті. Қылмыстық кодексте сыбайлас жемқорлық қылмыс субъектілері ретінде мемлекеттік функцияларды орындауға уәкілеттік берілген және оларға теңестірілген адамдар көрсетілген. Сондықтан жұмыстан міндетті түрде шығару шарасы тек осындай мәртебесі бар қызметкерлерге ғана қолданылуы тиіс.

Сот аталған норманы Конституцияға сәйкес деп таныды, бірақ оны барлық қызметкерлерге емес, тек мемлекеттік функцияларды атқаратын немесе оларға теңестірілген адамдарға қатысты қолдану қажет екенін нақтылады. Үкіметке осы шешімді ескере отырып, заңнаманы жетілдіру ұсынылды.

Бүгін, 15:17