Құрылтай сайлауы өңірлердің дауысын күшейте ала ма?

Бірпалаталы Парламентке көшу заң шығару процесін жылдамдатып, заң жобаларының сапасын арттырудан бөлек, азаматтардың осы процестерге араласуына кеңінен жағдай жасамақ. Президент жанындағы Қазақстандық стратегиялық зерттеулер институты Саяси зерттеулер бөлімінің бас сарапшысы Айгерім Абдрашитованың пікірінше, бұл ретте Құрылтай туралы Конституциялық заңның қабылдануы маңызды қадамдардың бірі болып отыр.

«Бұл құжат заң шығарушы билікті жаңғыртумен қатар, қоғам мен мемлекет арасындағы байланысты нығайтып, азаматтардың саяси процеске қатысуының жаңа тетіктерін қалыптастыруға жол ашады. Жаңа заң Құрылтайдың мемлекеттік басқару жүйесіндегі рөлін едәуір кеңейтеді. Енді депутаттар заң шығару қызметімен қатар Премьер-министрді, Вице-президентті, Конституциялық Сот судьяларын, Жоғары аудиторлық палата мен Орталық сайлау комиссиясының мүшелерін тағайындауға келісім беру рәсіміне қатысады. Сонымен қатар Үкімет қызметіне парламенттік бақылау күшейтіліп, министрлердің есептерін тыңдау және саяси жауапкершілік тетіктері кеңейтіледі», деді ол.

Абзал Құспан: Сайлаудың сапасы партиялардың кадрлық әлеуетіне байланысты болады

Сарапшының пікірінше, мұндай өзгерістер алғашында азаматтардың күнделікті өмірінен алшақ көрінуі мүмкін. Алайда дәл осы өкілді органдар қоғамның өмір сүру қағидаларын айқындайтын маңызды шешімдерді қабылдайды. Сондықтан олардың тиімді жұмысы мемлекеттік басқару сапасы мен өңірлердің дамуына тікелей әсер етеді.

«Әлемдік тәжірибеде мемлекеттің тұрақтылығы мүдделер қақтығысының аздығымен емес, қоғамдық тепе-теңдікті сақтап, ортақ шешімге келе алуымен өлшенеді. Жаңа сайланбалы орган түрлі саяси күштерді, өңірлер мен қоғамдық топтарды бір алаңға жинап, елдің дамуына қатысты келісілген шешімдер қабылдауға мүмкіндік береді. Сондықтан қазіргі жағдайда Құрылтай қоғамдық диалогты дамытуға, мемлекет пен азаматтар арасындағы сенімді нығайту мәселелері бойынша жалпыұлттық консенсус қалыптастырудың негізгі тетіктеріне айналып отыр», дейді Айгерім Абдрашитова.

Құрылтай ең алдымен қандай мәселелерге назар аударуы тиіс?

Сарапшы бұл ретте Құрылтай жұмысының тиімділігі қабылданған шешімдердің санымен емес, олардың сапасы, қоғам тарапынан қолдау табуымен бағаланатындығын еске салды. 

Еске сала кетейік, елімізде Құрылтай сайлауы 23 тамызға белгіленді.