Құрылтай сайлауы жаңа кезеңге бастар қадам

Парламентаризм институты Жария заңнама және мемлекеттік басқару орталығының басшысы Шолпан Саймованың айтуынша, конституциялық реформаны практикалық тұрғыда іске асыру кезеңінде қоғамдық талаптардың күшеюі заң сапасының артуына да оң ықпал етеді.

«Құрылтай сайлауының тағайындалуы саяси жүйе мен мемлекеттік басқару моделін толыққанды жаңғыртудың алғашқы қадамы болды. Қазіргі заманғы заң шығару қызметі терең ғылыми талдаусыз, ықтимал салдарды бағалаусыз және заңнамалық бастамаларға кәсіби сараптама жүргізусіз мүмкін еместігін көрсетіп отыр. Сондықтан Құрылтайға ұсынылатын әрбір бастама құқықтық тұрғыдан ғана емес, сонымен қатар оның экономикалық, әлеуметтік және экологиялық ықпалы ескеріле отырып бағалануы қажет», деді Шолпан Саймова.

Қос палатадан бір палатаға: 23 тамыз – Құрылтай сайлауы

Сарапшының айтуынша, Құрылтайды қалыптастырудың жаңа қағидалары партиялық бағдарламалардың және заңнамалық бастамалардың маңызын арттырады. Осыған байланысты қабылданатын шешімдерді ғылыми және талдамалық тұрғыдан сүйемелдеуде жаңа технологияның рөлі арта түспек.

«Құрылтай сайлауы заң шығару рәсімдерін жетілдірумен, олардың ашықтығы мен қоғам алдындағы жауапкершілігін арттырумен қатар жүретін дәйекті саяси жаңғыртудың бір бөлігі саналады. Бұл үдерісте үлкен деректер көлемін талдауға, заңнамадағы ықтимал қайшылықтарды анықтауға және қабылданатын шешімдердің салдарын дәлірек болжауға мүмкіндік беретін заманауи ақпараттық-талдамалық жүйелер мен жасанды интеллект технологиялары ерекше рөл атқаруға тиіс», деді ол.

Құрылтай ең алдымен қандай мәселелерге назар аударуы тиіс?

Сарапшы сондай-ақ тиімді заң шығару қызметіне ғылыми қауымдастықтың, кәсіби бірлестіктердің, бизнес өкілдерінің, азаматтық қоғам институттарының және өңірлік сарапшылардың пікірі кеңінен ескерілуі тиіс екендігін айтты. Оның айтуынша, мұндай тәсіл қабылданатын шешімдердің ғылыми негізділігін қамтамасыз етіп, азаматтардың заң шығару процесіне деген сенімін арттыруға мүмкіндік береді.

Еске сала кетейік, елімізде Құрылтай сайлауы 23 тамызға белгіленді.