Құтқарушылар ​Маңғыстауда газ кен орнындағы апатты жоюда

Маңғыстау облысындағы Солтүстік-Шығыс Қаратұрын кен орнында газ-су қоспасының қуатты атқылауы орын алды. Оқиға орнында биіктігі 20 метрге дейін жеткен бұрқақ пайда болған, деп хабарлайды Lada.kz.

Апат 3 наурыз күні түсте «Бузачи Нефть» ЖШС-не тиесілі №403 ұңғымада орын алды. Облыстық ТЖД дерегінше, бұрғылау кезінде газ-су көрінісі тіркелген, бірақ өрт шықпаған.

Апатты жоюға ТЖД қызметкерлері мен кәсіби «Ақ Берен» авариялық-құтқару қызметі жұмылдырылды. Ведомствоның мәліметінше, зардап шеккендер жоқ, жағдай толық бақылауда. Мамандар атқылауды толық тоқтатуға дайындық жүргізіп жатыр.

Оқиғаның себептері «Азаматтық қорғау туралы» заң аясында ресми тергеу барысында анықталмақ.

Бұл «Бузачи Нефть» компаниясының активтерінде болған алғашқы ірі апат емес. 2023 жылы көршілес «Қаратұрын Оңтүстік» учаскесінде осындай атқылау болып, жарты жылға созылған өртке ұласқан еді. Сол кезде экологтар ауадағы метан концентрациясының 480 есе артқанын тіркеп, компанияға 2,2 млрд теңге айыппұл салынған.

Бүгін, 12:08