​Қытай Филиппиннің қорғаныс министрі мен оның отбасына санкция салды

Қытай Филиппиннің қорғаныс министрі Гилберто Теодоро мен оның отбасы мүшелеріне санкция енгізді. Бұл шешім министрдің «жауапсыз мәлімдемелеріне» байланысты қабылданғанын ҚХР Сыртқы істер министрлігі хабарлады, деп жазады АА.

Мәлімдемеде Теодороның сөздері Қытайдың заңды мүдделеріне зиян келтіріп, екіжақты қатынастарды әлсіретеді деп көрсетілген. Санкцияға сәйкес министрдің өзі, жұбайы және баласына Қытайдың құрлық бөлігіне, сондай-ақ Гонконг пен Макаоға кіруге тыйым салынды. Бұдан бөлек, Қытайдағы жеке және заңды тұлғаларға Теодоро және оның отбасы мүшелерімен кез келген мәміле немесе ынтымақтастық жасауға болмайды.

Соңғы уақытта Филиппин министрінің Оңтүстік Қытай теңізіндегі аумақтық дауларға қатысты мәлімдемелері назар аудартқан. 24 наурызда ол Филиппин қарулы күштерінің Батыс қолбасшылығының 49 жылдығына арналған сөзінде АСЕАН елдерінің ешқайсысы Қытайдың 1947 жылы жариялаған картасын мойындамайтынын айтты.

«Бұл – ең үлкен ойдан шығарылған өтірік, оны ешбір ақыл-есі дұрыс адамға таңуға болмайды», – деді ол.

Өткен айда Сингапурдағы «Шангри-Ла диалогы» қауіпсіздік форумында Теодоро Қытайды елге «аумақтық және саяси тұрғыдан елеулі қауіп төндіріп отыр» деп мәлімдеді. Ол сондай-ақ Қытайды Оңтүстік Қытай теңізіндегі тараптардың мінез-құлық кодексін әзірлеуге басты кедергі деп атады.

Ал Пекин өз кезегінде Қытайдың Филиппинге Ормуз бұғазындағы дағдарыс салдарын жеңілдету үшін тыңайтқыш пен жанармай бергенін еске салып, Теодороның «Қытайға алғыс білдірмегенін» сынға алды.

Оңтүстік Қытай теңізіндегі дау

Бұл теңіз Екінші дүниежүзілік соғыстан кейін тәуелсіздік алған мемлекеттер арасында аумақтық даулардың басты ошағына айналды. Қытай 1947 жылғы картасына сүйеніп, теңіздің шамамен 80%-ына егемендік талап етеді. Алайда Филиппин, Вьетнам, Бруней және Малайзия да бай табиғи ресурстарға ие аймақтарға өз талаптарын қойып отыр.

Қытайдың даулы аралдарда әскери базалар салуына және аймақтағы әскери, азаматтық белсенділігіне көршілес мемлекеттер мен АҚШ қарсы шығады.

2016 жылы Гаагадағы Тұрақты арбитраждық сот Филиппиннің шағымы бойынша Қытайдың Оңтүстік Қытай теңізіндегі біржақты егемендік талаптарының заңды негізі жоқ деп шешім шығарған.

Бүгін, 12:50